لە هێرشێکی مووشەکیدا بۆ سەر بەرزاییەکانی جۆلان 11 ئیسرائیلی کوژران

ئاڤا نیوز

هێرشێکی مووشەکی کرایە سەر شارۆچەکەی مەجدەل شەمس لە بەرزاییەکانی جۆلان، بەهۆیەوە 11 ئیسرائیلی کوژران و 34ی دیکە بریندار بوون، حیزبوڵڵای لوبنانیش ڕەتی دەکاتەوە هێرشەکەی کردبێت.
 

وێنە گەورەکە: هێرشە مووشەکییەکە لە لوبنان کراوە، هەرچەندە حیزبوڵڵای لوبنان کە گرووپێکی چەکداریی نزیک لە ئێرانە، ڕەتی دەکاتەوە هێرشەکەی کردبێت، بەڵام ئیسرائیل بە بەرپرسیاری دەزانێت.

بۆچی گرنگە: دوای ئەم هێرشە مەترسی دروستبوونی شەڕی ئیسرائیل و حیزبوڵڵا لەئارادایە، بە هەڵگیراسانی ئەم شەڕە دۆخی ڕۆژهەڵاتی ناوەڕاست زیاتر ئاڵۆز دەبێت.

 

ڕاگەیێنراوی فەرمی: ئێلی بن، بەرپرسی فریاکەوتنی مەجدال شەمس ڕایگەیاندووە، بەهۆی هێرشەکەوە 11 کەس گیانیان لەدەست داوە،  34ی دیکە بریندارن و 17 لە بریندارەکان دۆخی تەندروستییان ناجێگیرە.

 

بۆچوونی لایەنی بەرامبەر: حیزبوڵڵای لوبنان دەڵێت: "بەتووندی ئەو تۆمەتانە ڕەتدەکەینەوە کە لەلایەن هەندێک میدیای دووژمن و پلاتفۆرمە میدیاییە جیاوازەکانەوە باس دەکرێن، سەبارەت بە بۆردوومانکردنی مەجدال شەمس، ئێمە بەهیچ شێوەیەک پەیوەندیمان بەو ڕووداوەوە نییە".

ئەمەش بزانە: بەرزاییەکانی جۆڵان دەکەوێتە سێگۆشەی سنووری نێوان ئیسرائیل  و  سووریا و  ئوردن و لەژێر دەستی ئیسرائیل دایە.