لە عێراق 25 تۆڕی نێودەوڵەتیی ماددەی هۆشبەر هەڵدەوەشێنرێنەوە

ئاڤا نیوز

لە سەرەتای ئەمساڵەوە وەزارەتی ناوخۆی عێراق 25 تۆڕی نێودەوڵەتیی بازرگانیکردن بە ماددە هۆشبەرەکانی هەڵوەشاندوونەتەوە، سزای لەسێدارەدانیش بۆ 74 تاوانبار دەرکراوە.

وێنە گەورەکە: چەند ساڵێکە بازرگانیکردن و بەکارهێنانی ماددە هۆشبەرەکان لە عێراق پەرەی سەندووە و  چەندین تۆڕی ناوخۆیی و نێودەوڵەتیی لەو بوارەدا چالاکن، بەپێی ڕاپۆرتەکانی نەتەوەیەکگرتووەکانیش خەریکە عێراق دەبێتە ناوەندی بڵاوبوونەوەی ماددەی هۆشبەر لە ناوچەکەدا.

ڕاگەیێنراوی فەرمی: زیاد خەلەف گاتع، بەڕێوەبەری سەنتەری بەدواداچوون و توێژینەوە لە وەزارەتی ناوخۆ ڕایگەیاند، "ئەمساڵ 25 تۆڕی نێودەوڵەتیی بازرگانیکردن بە ماددە هۆشبەرەکان بە هاوکاری لەگەڵ وڵاتانی دراوسێ هەڵوەشێنراونەتەوە".

زانیاریی زیاتر: لە سەرەتای ئەمساڵەوە لە دادگاکانی عێراق سزای لەسێدارەدان بۆ 74 بازرگانی ماددە هۆشبەرەکان دەرکراوە. ئەو سزایانەی لەمساڵدا دەرکراون زۆر گەورەن، بە جۆرێک لە سێ ساڵی ڕابردوودا تەنیا  54 سزای لەو جۆرە دەرکراون.