ئاڤا ناوی بەربژێری لایەنەکان بۆ پۆستی پارێزگاری کەرکووک بڵاودەکاتەوە

ئاڤا نیوز

13 ڕۆژ ماوە بۆ تەواو بوونی وادەی دیاریکراو بۆ دانانی پارێزگار و دابەشکردنی پۆستەکانی دیکەی کەرکووک، سوودانی بەڕوونی بەلایەنەکانی گوتووە ئەگەر لەو ماوەیەدا نەگەنە ڕێککەوتن، خۆی کەسێک دەکات بە پارێزگار.

وێنە گەورەکە: 17 ڕۆژ بەسەر یەکەم دانیشتنی ئەنجوومەنی پارێزگای کەرکووک تێدەپەڕێت، بەبێ ئەوەی هیچ لەیەک نزیکبوونەوەیەک لە نێوان لایەنە براوەکانی ئەو پارێزگایە هەبێت.

زانیاریی بەدەستهاتوو: بە گوێرەی زانیارییەکانی ڕۆکان مەحموود، پەیامنێری ئاڤا لە کەرکووک،" ڕێبوار تەها، ئەندامی ئەنجوومەنی پارێزگای کەرکووک بەهێزترین بەربژێری یەکێتییە بۆ وەرگرتنی پۆستی پارێزگاری کەرکووک، هاوکات دڵشاد پیرۆت ئەندامی پێشووتری ئەنجوومەنی پارێزگای کەرکووک بەربژێری پارتی و محەممەد سەمعان بەربژێری بەرەی تورکمانییە".

لە لایەکی دیکەوە: عەزام حەمدانی، لە هاوپەیمانی عەزم بە ئاڤا نیوزی گوت: "لایەنە عەرەبەکانی کەرکووک لەسەر بەربژێرێکی دیاریکراو کۆکنین، زیاتر لە چوار کەس بۆ ئەو وەرگرتنی ئەو پۆستە بەربژێرکراون لە عەزم، سیادە، قیادە و تەقەدووم".

ئەوەی پێشبینی دەکرێت: لە ئەگەری کۆکنەبوونی لایەنەکان لەسەر بەربژێرێک، چاوەڕواندەکرێت خالید شوانی، وەزیری دادی عێراق لەلایەن سەرۆکوەزیرانی عێراق بکرێت بە پارێزگاری کەرکووک.