دانیشتنی دادگای فیدراڵی لەبارەی هەڵبژاردنی هەرێمی کوردستان دواخرا

ئاڤا نیوز

جارێکی دیکە دانیشتنی دادگای فیدراڵی سەبارەت بە یاسای هەڵبژاردنی پەرلەمانی کوردستان بۆ ڕۆژی یەکشەممە 18ـی ئەم مانگە دواخرا؛ بۆ دەیەمین جارە دادگای فیدراڵی بڕیاردان لەبارەی ئەم کەیسە دوادەخات. 

 

بۆچی گرنگە: یەکلاکردنەوەی ئەم کەیسە لەلایەن دادگای فیدراڵییەوە بەرچاوڕوونی دەداتە هەرێمی کوردستان تاوەکو وادەیەک بۆ بەڕێوەچوونی خولی شەشەمی هەڵبژاردنی پەرلەمانی کوردستان دیاری بکات. 

 

چیرۆکی سەرەکی: زیاد جەبار، سەرۆکی فراکسیۆنی یەکێتی لە پەرلەمانی کوردستان و ئامانج نەجیب شەمعوون، ئەندامى کریستیانەکان لە ئەنجوومەنى پارێزگاى سلێمانى سکاڵایان لەسەر پێنج ماددەی یاسای هەڵبژاردنی پەرلەمانی کوردستان تۆمارکردووە، بڕیاربوو ئەمڕۆ دادگای فیدراڵی کەیسەکە یەکلابکاتەوە، بەڵام دانیشتنەکە بۆ هەفتەی داهاتوو دواخرا.

 

باکگراوند: تەمەنی خولی پێنجەمی پەرلەمان ڕۆژی 06-11-2022 کۆتایی هاتووە، واتە زیاتر لە ساڵێکە بەهۆی ڕێکنەکەوتنی لایەنەکان لەسەر وادەیەک بۆ بەڕێوەچوونی خولی شەشەمی پەرلەمانی کوردستان، هیچ جوڵەیەک لە پەرلەمانی کوردستان نییە.