نێچیرڤان بارزانی: جینۆسایدی ئێزدییەكان هێشتا برینێكی كراوەیە

ئاڤا نیوز  

نێچیرڤان بارزانی، سەرۆكی هەرێمی كوردستان،ڕایدەگەیەنێت "هەتا تاقە ڕفێنراوێكی ئێزدی مابێت تیمەكان لە هەوڵی ڕزگاردنیان بەردەوام دەبن".

وێنە گەورەكە: ڕۆژی 03-08-2014، داعش هێرشی کردە سەر شنگال، لە ڕۆژی 13-11-2015، بە سەرپەرشتی سەرۆک بارزانی لەلایەن هێزەکانی پێشمەرگەوە تەواوی شنگال ڕزگار كرا.

ئەوەی پێویستە بیزانیت: لە دەیەمین ساڵیادی جینۆسایدی ئێزدیان، ئەمڕۆ بە ئامادەبوونی نێچیرڤان بارزانی، سەرۆكی هەرێمی كوردستان لە شاری هەولێر، ڕێوڕەسمێك بەڕێوەچوو.

لێدوانی فەرمی: نێچیرڤان بارزانی، لە ڕێوڕەسمەكەدا گوتارێكی پێشكەش كرد و ڕایگەیاند: دوای تێپەڕبوونی 10 ساڵ بەسەر جینۆسایدی ئێزدییان، هێشتا برینێكی كراوەیە و تاوەكو ئێستا هاووڵاتیانی ئێزدیمان بەدەست لێكەوتەكانی دەناڵێنن.

زانیاریی زیاتر: نێچیرڤان بارزانی ئاماژەی بە ئەوەش دا، هەموو خوشك و برایانی ئێزدی دڵنیا دەكەینەوە، هەتا تاقە ڕفێنراوێكی ئێزدی مابێت، تیمەكان لە كاركردن و هەوڵەكانیان بۆ ڕزگاركردنی ڕفێنراوان بەردەوام دەبێت، پێویستە حكومەتی عێراقی فیدڕاڵ لەگەڵ حكومەتی هەرێمی كوردستان هاوكاربێت بۆ جێبەجێكردنی ڕێككەوتننامەی شنگال و ئاساییكردنەوەی دۆخی ناوچەكە.