تەندروستیی هەولێر: ئەو ئاوەی دەگاتە ماڵان خاوێنە و بە كەڵكی خواردنەوە دێت

ئاڤا نیوز

 

بەڕێوەبەری خۆپاراستنی تەندروستیی هەولێر ڕایدەگەیێنێت، ئەو ئاوەی دەگاتە ماڵان خاوێنە بە كەڵكی خواردنەوە دێت.

 

بۆچی گرنگە: ئەو ئاوەی دەگاتە ماڵان لەلایەن تیمە تایبەتەكانی بەڕێوەبەرایەتییەكانی ئاو و خۆپاراستنی تەندروستییەوە پشكنینی بۆ دەكرێت ئەگەر لە شوێنێک گرفتێک هەبێت بەزوویی چارەسەر دەكرێت.

 

لێدوانی فەرمی: د. بێریڤان یاسین، بەڕێوەبەری خۆپاراستنی تەندروستیی هەولێر بە ئاڤا نیوزی گوت: لە زۆرینەی گەڕەكەكان ئەو ئاوەی لەڕێگەی پڕۆژەی ئیفراز یاخود بیرەكانەوە دەگاتە ماڵەكان خاوێنە و بە كەڵكی خواردنەوە دێت و بە بەردەوامی تیمەكانمان پشكنین بۆ نموونەی ئاوی گەڕەكەكان و كارگەكانی ئاوی دەبەش دەكەن.

 

زانیاریی زیاتر: سەبارەت بە بەراوردی ئاوی نێو دەبە و ماڵان، د. بێریڤان یاسین گوتی: هەردوو جۆری ئاوەكە خاوێنن و بۆ خواردنەوە دەشێن، ئەگەر كەسێكیش لە ئاوی ماڵەكەی زۆر دڵنیا نەبێت دەتوانێت ئاوە بكوڵێنێت و پاشان بیخواتەوە.

 

ئەوەش بزانە: بەڕێوەبەرایەتییە ڕێنوێنی هاونیشتمانیان دەكات كە شەش مانگ تاوەكو ساڵی جارێک تانكی ماڵەكانیان پاک بكەنەوە.