سبەی كۆمیسیۆن ژمارە بە حیزب و بەربژێرە نوێیەكانی هەڵبژاردن دەدات

ئاڤا نیوز

كۆمیسیۆنی باڵای سەربەخۆی هەڵبژاردنەكانی عێراق، سبەی تیروپشك دەكات بۆ پێدانی ژمارە بە هاوپەیمانی و حیزب و بەربژێرە نوێیەكانی بەشداربوو لە هەڵبژاردنی پەرلەمانی كوردستان.

وێنە گەورەكە: كۆمسیۆنی سەربەخۆی هەڵبژاردنەكانی عێراق تائێستا زۆربەی ڕێكارەكانی پرۆسەی هەڵبژاردنی پەرلەمانی كوردستانی تەواوكردووە، كە بریارە لە 20-10-2024 لەسەرجەم پارێزگاكانی هەرێمی كوردستان بەڕێوەبچێت.

لێدوانی فەرمی: جومانە غەلای، گوتەبێژی كۆمیسیۆنی باڵای هەڵبژاردنەكانی عێراق ڕایگەیاند: رۆژی شەممە  10-8-2024  لە هەولێر، تیروپشكێكی تایبەت بۆ پێدانی ژمارە بەو هاوپەیمانی و حیزب و  بەربژێرانە دەكەین كە لە پرۆژەی تیروپشكی پێشوودا ژمارەیان وەرنەگرتووە.

زانیاریی زیاتر:"ئەم تیروپشكە تەواوكەری تیروپشكەكەی پێشووە و لەژمارە 170 ـەوە دەستپێدەكات، ئەو بەربژێرانەش دەگرێتەوە كە لە لیستی هەڵبژاردنی گشتییەوە گواسترانەوە بۆ پشكی كۆتای پێكهاتەكان و ژمارەی نوێیان پێدەدرێت". جومانە غەلای وای گوت.