سوودانی بە فڕۆکەیەکی سەربازی لە گەورەترین فڕۆکەخانەی عێراق نیشتەوە

ئاڤا نیوز 

 

بەرەبەیانی ئەمڕۆ فڕۆکە سەربازییەکەی سەرۆکوەزیرانی عێراق لە فڕۆکەخانەی نێودەوڵەتیی کەربەلا نیشتەوە، دوای ئەوەی کارکردن لە فڕۆکەخانەکە گەیشتووەتە قۆناغەکانی کۆتایی.

 

وێنە گەورەکە: حکومەتی عێراق پلانی هەیە بۆ ساڵی داهاتوو سێ فڕۆکەخانەی دیکەی نێودەوڵەتی لە شارەکانی باشوور و باکووری وڵاتەکە بکاتەوە. فڕۆکەخانەی نێودەوڵەتیی کەربەلا یەکێکە لەو فڕۆکەخانانە و فڕۆکە سەربازییەکەی سوودانی یەکەم فڕۆکەبوو کە لەو فڕۆکەخانەیە بنیشێتەوە.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: ئەو فڕۆکەیەی کە محەممەد شیاع سوودانى، سەرۆکوەزیرانی گواستەوە، لە گۆڕەپانی فڕۆکەخانەی نێودەوڵەتیی کەربەلا نیشتەوە، دوای ئەوەی کارکردن تێیدا گەیشتە قۆناغەکانی کۆتایی".

 

زانیاریی زیاتر: دوای بەسەرکردنەوەی بەشەکانی فڕۆکەخانەکە، سوودانی سەردانی وێستگەی غازی کەربەلا دەکات و بەردی بناغەی دوو پرۆژە دادەنێت، یەکێکیان وێستگەیەکی هەڵمی بە توانای 132 مێگاوات و وێستگەی کەربەلا بۆ وزەی خۆر بە توانای 300 مێگاوات.

 

ئەمەش بزانە: فڕۆکەخانە نێودەوڵەتیی کەربەلا لەلایەن کۆمپانیایەکی بەریتانییەوە بە تێچووی 500 ملیۆن دۆلار دروست دەکرێت، ساڵانە توانای پێشوازیکردنی لە شەش ملیۆن گەشتیار هەیە و دەبێتە گەورەترین فڕۆکەخانەی عێراق.