ژمارەیەک پایتەخت گیرۆدەی کارەبان

ئاڤا نیوز

 

بەگوێرەی توێژینەوەیەک، پچڕانی بەردەوامی کارەبا زیانی ئابووری و دەروونی بە دانیشتووانی پایتەختی حەوت وڵاتی عەرەبی گەیاندووە.

چیرۆكه‌ سه‌ره‌كییه‌كه‌: لە میسر ڕۆژانە نزیکەی سێ کاتژمێر کارەبا دەپچڕێت، لە لوبنان زیاتر لە 10 کاتژمێر و لە عێراقیش زیاتر لە شەش کاتژمێر، هەمان گرفتیش ڕووبەڕووی وڵاتانی یەمەن، سوودان، سووریا و کوەیت بووەتەوە.

زیانه‌ سه‌ره‌كییه‌كان: بەهۆی پچڕانی کارەبا، زۆربەی کارگەکانی چەمەنتۆ لە میسر داخراون و کارمەندەکانیان ناردووەتە ماڵەوە، هاوکات خێزانە لوبنانی و عێراقییەکانیش پارەیەکی زۆر بە کارەبای مۆلیدە ئەهلییەکان دەدەن و ئەمەش کاریگەری کردووەتە سەر باری ئابووری و دەروونییان. 

هۆكاره‌ زانراوه‌كان: هۆکارەکانی پچڕانی بەردەوامی کارەبا لە وڵاتێکەوە بۆ وڵاتێکی دیکە جیاوازە، لە میسر دەسەڵاتداران دەڵێن: "قەیرانەکە کاتیە". لە یەمەنیش دەگەڕێتەوە بۆ کاریگەریی سزاکانی ئابووری و سیاسیی سەر وڵاتەکە، هەرچی عێراق و لوبنانیشە، هۆکاری سەرەکیی پچڕانی کارەبا، گەندەڵییە.