عێراق دەیەوێت گەشەی ئابووری دوو هێندەی گەشەی دانیشتووان بەرزبکاتەوە

ئاڤا نیوز

 

حکومەتی عێراق پلانێکی پێنج ساڵەی بە ناوی "پلانی گەشەپێدان" دەستپێکردووە و دەیەوێت تا ساڵی 2028، گەشەی ئابوورییەکەی 4.5% بەرزبکاتەوە.

 

وێنە گەورەکە: بانکی نێودەوڵەتی لە ڕاپۆرتێکدا پشتڕاستی کردەوە کە گەشەی ئابووریی عێراق لە ساڵی 2022 دا گەیشتووەتە 7.6%، بەڵام لە ساڵی 2023 دابەزیوە بۆ 2.9%.

 

هۆکارە زانراوەکان: گەشەی ئابووری لە عێراقدا گەشەیەکی خودی یان پلان بۆ داڕێژراو نییە، بەڵکو پەیوەستە بە گۆڕاوە دەرەکییەکانەوە، گرنگترینیان بەرزبوونەوەی خواستی جیهانییە بۆ نەوت و بەرزبوونەوەی نرخەکەی.

 

لێدوانی فەرمی: عەبدولزەهرە هینداوی، گوتەبێژی وەزارەتی پلاندانانی عێراق بە ئاڤا نیوزی گوت، پلانی پێنج ساڵەی گەشەپێدان لە 3ـی ئابەوە کەوتووەتە بواری جێبەجێکردنەوە و تا ساڵی 2028 بەردەوام دەبێت، ئامانجی حکومەتیش لەو پڕۆژەیە ئەوەیە گەشەی ئابووری وڵات لەو پێنج ساڵەدا 4.5% بەرزبکاتەوە.

 

بۆچی گرنگە: عێراق پێشبینی دەکات تا پێنج ساڵی داهاتوو گەشەی دانیشتووان بە تێکڕا 2.5% زیاد بکات، بۆیە دەیەوێت گەشەی ئابوورییەکەی دوو بەرامبەری گەشەی دانیشتووانەکەی بێت، لەو چوارچێوەیەشدا دەیەوێت چاکسازی دارایی و کارگێڕی بکات و کاروباری حکومەتیش بەئەلیکترۆنی بکات.