كوردێك بە ئاڵای كوردستانەوە دەچێتە سەر مانگ

ئاڤا نیوز

دادڤان عیسمەت، گەنجێكی كوردی خەڵكی شاری زاخۆیە، دوو ملیۆن دۆلار خەرج دەکات بۆ ئەوەی بە ئاڵای كوردستانەوە بچێتە سەر مانگ.

وێنە گەورەكە: دوای ئەوەی لە چەند مانگی ڕابردوودا بە ئاڵای كوردستان چووە  ئێڤرێست، بەرزترین چیای جیهان، دادڤان عیسمەت كە گەنجێكی كوردی تەمەن 24 ساڵە، دەیەوێت ئەمجارە بە ئاڵای كوردستانەوە بچێتە سەر مانگ.

لێدوانی فەرمی: دادڤان بە ئاڤا نیوزی گوت: "چوونە سەر مانگ بە ئاڵای كوردستانەوە خەونی منداڵیمە، ڕێككەوتنم لەگەڵ كۆمپانیایەكی ئەمریكی واژۆ كردووە بۆ ئەوەی بچمە بۆشایی ئاسمان و سەر مانگ".

لەلایەكی دیكەوە: عیسمەت گوللی، باوكی دادڤان بە ئاڤا نیوزی گوت: ئەمەی دادڤان دەیكات خەباتە، باوك و باپیرانی ئێمەش خەباتیان كردووە بۆ ئەم ئاڵایە و كورد هەزاران شەهیدی لەو پێناوە داوە، ئێستاش گەنجێكی كورد ئاڵای كوردستان دەباتە سەر مانگ بۆ ئێمە جێگەی شانازییە و دەمانەوێت كورد و كوردستان زیاتر بە جیهان بناسێنین".

زانیاریی زیاتر: تێچووی چوونە سەر مانگ دوو ملیۆن دۆلارە و کۆمپانیایەکی ئەمریکی گەشتەکان ڕێکدەخات، بەهۆی ئەوەی لە جیهان چەندین كەس داوای ئەو گەشتە دەكەن، كۆمپانیاكە بە سەرە گەشتیاران دەبات، ساڵی داهاتووش سەرە بەر دادڤان دەکەوێت.