محەممەدی حاجی مەحموود: هەموو پرسێکی کورد لە مووچەدا کۆبووەتەوە

ئاڤا نیوز

سەرۆکی حزبی سۆسیال دیموکراتی کوردستان ڕایگەیاند، دۆخی ڕۆژهەڵاتی ناوەڕاست و ناوچەکە خراپە و دەبێت کورد پێکەوە خۆی ئامادە بکات، ئێستا هەموو پرسێکی کورد لە مووچەدا کۆبووەتەوە.

وێنە گەورەکە: ئەمڕۆ لە گوڵەخانە دووەم دیداری گوڵەخانە لەژێر درووشمی ستراتیژی و گوتاری نەتەوەیی لە ناوچە کوردستانیەکانی دەرەوەی ئیدارەی هەرێم بەڕێوەچوو و تێیدا سەرۆکی  حزبی سۆسیال دیموکراتی کوردستان گوتارێکی پێشکەش کرد.

لێدوانی فەرمی: محەممەدی حاجی مەحموود، سەرۆکی پارتی سۆسیال دیموکراتی کوردستان لە گوتارەکەیدا ڕایگەیاند: ناوچەکە ئاگری گرتووە و وڵاتان خۆی بۆ شەڕ ئامادە کردووە، ئێمەی کورد بێخەم و کەمتەرخەمین، پێویستە هێزە سیاسییەکانی کوردستان پێکەوە کۆببنەوە و بەرنامەیەک بۆ ئەو هەڵومەرجە دابنێن.

زانیاریی زیاتر: "دەبێت باس لەو بابەتانە بکرێن کە چارەنووسی میللەتێک پێوەی بەستراوەتەوە و  شۆڕش، شەهید، کیمیاباران، ئەنفال و وێرانکردنی چوار هەزار و 500 گوندی کوردستان هەموو لە مووچەدا کۆبووەتەوە کە هات یان نەهات". محەممەدی حاجی مەحموود وادەڵێت.