فەرماندەیەکی پێشمەرگە: هێزەکەی حەشدی شەعبی دەستی بە پاشەکشە کردووە

ئاڤا نیوز

فەرماندەیەکی باڵای وەزارەتی پێشمەرگە ڕایدەگەیێنێ، ھێزەکەی حەشدی شەعبی لە ناحیەی کوڵەجۆی سنووری گەرمیان دەستی بە پاشەکشە کردووە.

چیرۆکی سەرەکی: سەرلەبەیانی ئەمڕۆ هێزێکی حەشدی شەعبی بە چەکی قورسەوە  بەرەو ناحیەی کوڵەجۆ جووڵەیان کرد و دەستیان بەسەر کێڵگەیەکی نەوتدا گرت،  ڕووداوەکە کاردانەوەی فراوانی لێکەوتەوە و داواکرا دەستبەجێ پاشەکشە بکات.

ئەوەی پێویستە بیزانیت: بەرپرسانی هێزەکەی حەشد گوتیان بۆ ئۆپەراسیۆنی سەربازی جووڵەیان کردووە، ڕێكکەوتنیان لەگەڵ یەکێتی کردووە و ڕاستەوخۆ قسەیان لەگەڵ بافڵ تاڵەبانی کردووە کە سێ ڕۆژ دەمێننەوە، بەڵام ئەوەی ڕوویدا جیاواز بوو، کێڵگەیەکی نەوتیان کۆنترۆڵ کرد و دەستیان بە دروستکردنی سەنگەر کرد، یەکێتیش بەفەرمی ڕەتیکردەوە ڕێککەوتنیان کردبێت و داوای کرد دەستبەجێ بکشێنەوە.

لێدوانی فەرمیی: فەرماندەیەکی باڵای پێشمەرگە کە خۆی لە ناحیەی کوڵەجۆیە بە ئاڤا نیوزی گوت: "دوای ئەوەی هێزی پێشمەرگە لە ناوچەکە ڕێگری لە هێزەکەی حەشدی شەعبی کرد سەنگەر لێبدەن، بەناچاری دەستیان بە پاشەکشە کرد".

زانیاریی زیاتر: هەرچەندە هێزەکانی پێشمەرگە ڕێگرییان لە جووڵەی زیاتری هێزەکەی حەشد کرد، بەڵام هیچ ڕووبەڕووبوونەوەیەکی سەربازی یان ڕووداوی نەخوازراو لەنێوان هێزی پێشمەرگە و هێزەکەی حەشدی شەعبی ڕووینەدا.