عەرەبە هاوردەکانی کەرکووک بە بڕیارێکی حکومەتی عێراق پابەند نابن

ئاڤا نیوز 

 

ئەو خێزانە عەرەبە هاوردانەی کەرکووک کە قەرەبووی ماددەی 140یان وەرگرتووە، بە بڕیارێکی حکومەتی عێراق پابەند نابن و ئامادەنین لە کەرکووک بڕۆن و بگەڕێنەوە ناوچەکانیان.

 

وێنە گەورەکە:  ئەمڕۆ پێنجشەممە 475 خێزان لە ئۆفیسی کەرکووکی ماددەی 140ی کەرکووک چەکی قەرەبوویان بۆ کراوە کە 100 خێزانیان کوردن.

 

ئەوەی پێویستە بیزانیت: یەكێک لە مەرجەکانی لایەنە کوردستانییەکان بۆ بەشداریکردن لە کابینەی سوودانی کاراکردنەوەی ماددەی 140 بوو، لەو چوارچێوەیەشدا ماوەی دوو ساڵە پێدانی قەرەبوو بە خێزانە هاوردەکراوەکان دەستیپێکردووەتەوە، هەر خێزانێکی عەرەب 20 ملیۆن دینار وەردەگرێت بەو مەرجەی بگەڕێنەوە ناوچەکانیان، 10 ملیۆن دیناریش بۆ هەر خێزانێکی کوردی زەرەرمەند تەرخان دەکرێت.

 

لێدوانی فەرمی: فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بە ئاڤا نیوزی گوت، "پێویستە لیژنەیەکی چاودێری لە کەرکووک پێکبهێنرێت، بۆ ئەوەی بەدواداچوون بۆ ئەو خێزانە عەرەبانە بکات کە لەکەرکووک قەرەبوویان وەرگرتووە  نەگەڕاونەتەوە ناوچەکانیان."

 

زانیاریی زیاتر: لە ماوەی ئەمساڵدا زیاتر لە هەزار و 500 خێزان لە کەرکووک قەرەبووی ماددەی 140 یان وەرگرتووە.