لە کەمپی بەحرکە 150 خێزانی ئاوارە هیچ شوێنێک نییە بۆی بڕۆن

ئاڤا نیوز  

پرۆسەی گەڕانەوەی ئاوارەی نیشتەجێی کەمپەکانی هەرێمی کوردستان بەخێرایی جێبەجێ دەکرێت، بەڵام لە کەمپی بەحرکە 150 ماڵی ئاوارە هەیە بەتەواوی شوێنی نیشتەجێبوونیان لەدەستداوە و ناتوانن بگەڕێنەوە ناوچەکانیان.

وێنە گەورەکە: دوای هێرشی چەکدارانی داعش لە ساڵی 2014، بە هەزاران خێزان لە پارێزگاکانی عێراق ئاوارەی هەرێمی کوردستان بوون و شوێنی نیشتەجێبوونیان بۆ دابینکرا.

زانیاريی بەدەستهاتوو: ئاڤا نیوز زانیویەتی لە کەمپی بەحرکە ئێستا 400 خێزان ماون، لەماوەی دوو ڕۆژی ڕابردوودا نزیکەی 700 کەس گەڕاونەتەوە ناوچەکانیان و ڕۆژی دووشەممەی هەفتەی داهاتوو ژمارەیەکی دیکە دەگەڕێنەوە، بەڵام 150 ماڵی ناوچەکانی موسڵ و سەڵاحەدین هیچ شوێنێکیان نییە بۆی بچن، لەبەرئەوەی شوێنی نیشتەجێبوونیان بەتەواوی لەدەستداوە.

ئەوەی پێویستە بیزانیت: وەزارەتی کۆچ و کۆچبەرانی حکومەتی عێراق چوار ملیۆن و 500 هەزار دینار دەدات بەهەر خێزانێک کە بڕیاربدات بگەڕێتەوە ناوچەکەی، بەڵام ئاڤا نیوز زانیویەتی لەو سەدان خێزانەی گەڕاونەتەوە بۆ ناوچەکانیان تەنیا 115 خێزان بڕە پارەکەیان پێدراوە.

باکگراوند: وەزارەتی کۆچ و کۆچبەران پلانی ئەوە بوو 30ی تەمموزی ئەمساڵ سەرجەم کەمپی ئاوارەکان لە هەرێمی کوردستان دابخات، بەڵام بڕیارەکە ڕاگیرا.