سەرەڕای ناکۆکییەکان چوارچێوەی هەماهەنگی کۆدەبێتەوە

ئاڤا نیوز

چوارچێوەی هەماهەنگی لەسەر کۆمەڵێک پرس کۆدەبێتەوە و ڕاوێژکاری ئاسایشی نیشتمانی و سەرۆکی دەستەی حەشدی شەعبیش بانگهێشتی کۆبوونەوەکە کراون.

 

وێنە گەورەکە: سەرەڕای ناکۆکیی نێوانیان، بڕیارە سبەی دووشەممە سەرکردەکانی چوارچێوەی هەماهەنگی کە زۆرینەی لایەنە شێعەکانی عێراق لە بەغدا کۆببنەوە.

 

زانیاریی بەدەستهاتوو: هێزەکانی چوارچێوەی هەماهەنگی لە نووسینگەی هادی عامری کۆدەبنەوە بە ئامادەبوونی قاسم ئەعرەجی، ڕاوێژکاری نیشتمانیی عێراق و فالح فەیاز، سەرۆکی دەستەی حەشدی شەعبی.

 

زانیاریی زیاتر: یاداشتی لێکتێگەیشتنی ئەمنیی نێوان عێراق و تورکیا، باردۆخی دارایی و ئابووریی وڵات و دۆسییەی دامەزراندنی دیپلۆماتکارەکانی عێراق تەوەری سەرەکیی کۆبوونەوەکە دەبن.

 

ئەوەی پێویستە بیزانیت: دۆسییەی دامەزراندنی 80 دیپلۆماتکار لە وەزارەتی دەرەوەی عێراق کە بەپێی لیژنەی پەیوەندییەکانی پەرلەمان حکومەت پێویستی پێیەتی بۆ پڕکردنەوەی کەمیی دیپلۆماتکارانی، لە ساڵی 2019ەوە هەڵپەسێردراوە بەهۆی ناکۆکیی لایەنەکان.

 

ئەمەش بزانە: تادێت ناکۆکییەکانی نێوان هێزەکانی چوارچێوەی هەماهەنگی زیاتر دەبن بە تایبەتی نێوان نووری مالیکی، سەرۆکی دەوڵەتی یاسا و محەممەد شیاع سوودانی، سەرۆکوەزیرانی عێراق بە تایبەتی دوای ئاشکرا بوونی دۆسیەی سیخوڕیی نووسینگەی سەرۆکوەزیران.