نەسروڵڵا: ئیسرائیل بە خوێن باج دەدات

ئاڤا نیوز

 حەسەن نەسروڵڵا، ئەمینداری گشتیی حیزبوڵڵا، "بەڵێنی" دا ئیسرائیل بە خوێن باجی کوشتنی ئەو هاووڵاتییانە دەدات کە ئەم هەفتەیە لە لوبنان کوژران. هەڕەشەی ئەوەشیكرد "مووشەکیان هەیە کە دەگاتە ئەوپەڕی سنووری باشووری ئیسرائیل".

چیرۆکی سەرەکی: چوارشەممە ئیسرائیل ڕایگەیاند لە نەبەتییە لە لوبنان عەلی ئەلدبس، کە فەرماندەیەکی حیزبوڵڵا بوو، لەگەڵ جێگرەکەی و چەکدارێکی تریان کوشتووە. سەرچاوەیەکی ئاسایشی لوبنان ڕایگەیاند جگە لەو سێ کەسە، لە هێرشێکی ئاسمانیی ئیسرائیلدا حەوت هاووڵاتیی سڤیلی سەر بە هەمان خێزان لە باشووری لوبنان کوژران.

لەلایەكی دیكەوە: حیزبوڵڵا ڕایگەیاند: ئەم کوشتنانە بۆ ئەوەن گوشار بخەنە سەر گرووپەکەیان بۆ ئەوەی مووشەک نەگرێتە ئیسرائیل، بەڵام وا نابێت، بەڵکو هێرشەکانیان چڕتر دەکەنەوە.

لێدوانی فەرمی: حەسەن نەسروڵڵا، ئەمینداری گشتیی حیزبوڵڵا لە گوتارێکی تەلەفیزیۆنیدا ڕایگەیاند: بەرامبەر کوشتنی هەر ژن و منداڵێک کە بە تەقەی سەر سنوور بکوژرێن، دوژمن بە خوێن باج دەدات، مووشەکی وردپێکمان هەیە کە دەگاتە ئیلات، لە باشووری ئیسرائیل.

باکگراوند: لە چەند ڕۆژی ڕابردوودا ئاڵوگۆڕی مووشەک لە نێوان ئیسرائیل و حیزبوڵڵادا ڕوویان دا و دوایینیان شەوی ڕابردوو بوو، کە ئیسرائیل پێنج چەکداری گرووپی ئەمەلی هاوپەیمانی حیزبوڵڵای کوشت.