پەیامێک لە سەرۆکوەزیران بارزانییەوە لەبارەی سەردانی سەرۆککۆماری ئێران

ئاڤا نیوز

 

دوای کۆبوونەوەی شاندی باڵای هەرێمی کوردستان لەگەڵ سەرۆککۆماری ئێران، سەرۆکوەزیران بارزانی لە پەیامێکدا جەخت لە پەرەپێدانی پەیوەندییەکانی نێوان هەولێر و تاران دەکاتەوە.

وێنە گەورەکە: ئەمڕۆ پێنجشەممە مەسعود پزیشکیان، سەرۆککۆماری ئێران  لە بەغداوە گەیشتە هەولێر، سەرەتا لەگەڵ شاندێکی باڵای هەرێمی کوردستان بە بەشداریی نێچیرڤان بارزانی و سەرۆکوەزیران مەسرور بارزانی کۆبووەوە، پرسە ئابووری، فەرهەنگی و ئەمنییەکانیان تاوتوێ کرد. دواتر بە جیا لەگەڵ سەرۆک بارزانی کۆبووەوە.

 

پەیامی فەرمی: سەرۆکوەزیران بارزانی لە پەیامێکدا خۆشحاڵی خۆی بە سەردانی مەسعود پزیشکیان دەربڕی و ڕایگەیاند: "بەردەوام دەبین لە پەرەپێدانی پەیوەندیی دراوسێیەتیمان لەسەر بنەمای ڕێزگرتن لە یەکتر و بەرژەوەندیی هاوبەش".

ئەوەی پێویستە بیزانیت: دوای 45 ڕۆژ لە دەستبەکاربوونی، پزیشکیان یەکەم گەشتی فەرمی بۆ عێراق و هەرێمی کوردستان کرد، ئەمەش پێگە و گرنگیی ئەو دوو شوێنە بۆ ئێران دەردەخات.