میت کوژرانی بەرپرسی کەمپی مەخمووری پەکەکە ڕادەگەیێنێت

ئاڤا نیوز

 

دەزگای هەواڵگریی تورکیا (میت) کوژرانی بەرپرسی کەمپی مەخمووری پارتی کرێکارانی کوردستان (پەکەکە)ـی ڕاگەیاند.

 

زانیاریی بەدەستهاتوو: میدیای فەرمی تورکیا، بە پشتبەستن بە سەرچاوە تایبەتەکانی لەنێو دەزگای هەواڵگریی تورکیا ناسراو بە (میت)، بڵاوی کردەوە: "لە ئۆپەراسیۆنێکی تایبەتدا لە کەمپی مەخموور، ئازاد ئاکنجی، بەرپرسی کەمپەکە کراوەتە ئامانج و کوژراوە". ئەمەش دوای ئەوەی ڕۆژی سێشەممە 10ـی ئەیلوول کەمپەکە لەلایەن درۆنێکی تورکیاوە بۆردوومان کرا.

 

زانیاریی زیاتر: ئازاد ئاکنجی لەلایەن دەزگای هەواڵگریی تورکیاوە داواکراو بووە و بەپێی ڕاگەیێنراوەکەی میت ئۆپەراسیۆنی بەئامانجگرتنی زۆر بەوردی داڕێژراوە.

 

لێدوانی فەرمی: سیروان بارزانی، بەرپرسی میحوەری گوێڕ – مەخمووری هێزەکانی پێشمەرگە بە ئاڤا نیوزی ڕاگەیاند: کاتژمێر 5:00ـی ئێوارە، بە درۆن خانووێک لە بەشی ڕۆژئاوای کەمپی مەخموور بۆردوومان کراوە، بەهۆیەوە کەسێک کوژراوە و دووانی دیکەش برینداربوون.

 

ئەمەش بزانە: کەمپی مەخموور لە ساڵی 1998ـەوە لە بناری چیای قەرەچووخ لە ڕۆژهەڵاتی مەخموور دروست کراوە. تورکیا چەندجارێک کەمپەکەی بۆردوومان کردووە و بە شوێنی پێگەیاندنی ئەندامانی پەکەکەی دەزانێت.