وەزارەتی بەرگریی تورکیا کوژرانی 17 چەکداری پەکەکەی لە هەرێمی کوردستان ڕاگەیاند

ئاڤا نیوز

 

بەپێی ڕاگەیێنراوێکی وەزارەتی بەرگری تورکیا، لە ماوەی دوو ڕۆژی ئۆپراسیۆنەکانی تورکیا لە ناوچە سنوورییەکانی هەرێمی کوردستان 17 گەریلای پەکەکە و سەربازێکی تورکیا کوژراون. 

 

چیرۆکی سەرەکی: لە میانەی بەردەوامی ئۆپراسیۆنە سەربازییەکانی سووپای تورکیا لە ناوچە سنوورییەکانی هەرێمی کوردستان، مەتین، گارە قەندیل، خواکورک، 17 گەریلای پەکەکە لە ڕووبەڕووبوونەوەی سەربازیدا کوژراون تەنها لە ماوەی دوو ڕۆژدا.

 

ڕاگەیێنراوی فەرمی: وەزارەتی بەرگریی تورکی لە ڕاگەیێنراوێکدا ڕایگەیاندووە: ژمارەیەک پێگەی چەکدارانی پەکەکەمان لە 17-18ی ئەیلوولدا پێکاوە، لە ئەنجامدا لە چیای گارە 8 پەکەکە و لە خواکورک 4 پەکەکە، لە قەندیل 5 پەکەکە کوژراون.

 

بۆچوونی لایەنی بەرامبەر: تاوەکو ئێستا پەکەکە هەواڵەکەی پشتڕاست نەکردووەتەوە بەڵکو لە ڕاگەیێنراوێکدا ڕایگەیاندووە، سەربازێکی تورکیا لە چیای گارە کوژراوە.

 

باکگرواند: ماوەی 46 ساڵە تورکیا و پەکەک لە شەڕ و ڕووبەڕووبوونەوەی چەکداریدان، بەپێی ئامارێکی وەزارەتی بەرگریی تورکیا لە سەرەتای ئەمساڵەوە ژمارەی کوژراوانی پەکەکە گەیشتووەتە هەزار و 868 کەس، بەڵام پەکەکە ئەم ژمارەیەی پشتڕاست نەکردووەتەوە.