کۆڵبەرێکی کورد دوای 18 مانگ لە برینداربوونی گیانی لەدەست دا

ئاڤا نیوز

 

کۆڵبەرێکی شاری پاوەی ڕۆژهەڵاتی کوردستان، دوای 18 مانگ لە برینداربوونی  بەهۆی هەستیاری شوێنی برینەکەی گیانی لەدەستدا.

 

وێنە گەورەکە: لە ڕۆژهەڵاتی کوردستان، هەزاران کەس کاری کۆڵبەری ئەنجام دەدەن، لە سنوورەکانی نێوان ئێران و هەرێمی کوردستانەوە کەلوپەل دەگوازنەوە.

 

ڕاگەیێنراوی فەرمی: ڕێکخراوی هەنگاو بۆ مافەکانی مرۆڤ ڕایدەگەیێنێت، ساڵێک و شەش مانگ لەمەوبەر هێزە ئەمنییەکانی ئێران لەسنووری "کەلەبەر"ی نەوسوود،  فەردین ڕۆستەم نەژادی کۆڵبەریان بریندار کرد، بەڵام بەهۆی ئەوەی گولـلە بەر بڕبڕەی پشتی کەوتبوو نەتوانراوە چارەسەر بکرێت.

 

زانیاریی زیاتر: بەپێی ڕاگەیێنراوی ڕێکخراوی هەنگاو، فەردین ڕۆستەم نەژاد، خێزاندارە و باوکی یەک منداڵ بووە، ماوەیەکی زۆر لە نەخۆشخانەی تاڵقانیی کرماشان خەوێندرا، بەڵام بەهۆی هەستیاری شوێنی برینەکەی چارەسەر نەکراوە.

 

باکگراوند: ئامارەکانی ڕێکخراوی هەنگاو دەریدەخات لەمساڵدا، زیاتر لە 47 کۆڵبەر کوژراون و 261 کۆڵبەریش بریندار کراون.