هەزاران هاووڵاتی لوبنان ئاوارەی سووریا دەبن

ئاڤا نیوز

 

لە ماوەی چەند  کاتژمێری ڕابردوودا هەزاران لوبنانی ئاوارەی سووریا بوون بە هۆکاری زیادبوونی گرژییەکانی نێوان حیزبووڵڵا و ئیسرائیل.

 

وێنە گەورەکە: بەهۆی بەردەوامی بۆردومانەکانی ئیسرائیل بۆسەر پێگە و بارەگاکانی حیزبووڵڵا لە خاکی لوبنان هەزاران هاووڵاتی ئاوارەی وڵاتی سووریا بوون و پێشتریش ئیسرائیل هۆشداری بە هاووڵاتیان دابوو کە پێویستە ناوچەکانیان بەجێبهێڵن لە پێناو سەلامەتی خۆیان.

 

ڕاگەیێنراوی فەرمی: نووسینگەی گەشتوگوزاری دیمەشق ڕایگەیاند: سەڕەرای ئەوەی زۆرێک لە وڵاتان گەشتەکانیان بۆ بەیروت ڕاگرتووە بەڵام هاتوچۆی نێوان دیمەشق و بەیروت ئاساییە. 

 

زانیاریی زیاتر: پەنابردنی لوبنانییەکان بۆ سووریا بەشێوەیەکی سەرەکی دەگەڕێتەوە بۆ بەرزی کرێی خانوو و نەبوونی ناوچەی ئارام لە وڵاتەکەی خۆیاندا. 

 

ئەوەش بزانە: لە لوبنان کرێی خانوو لەنێوان 500 دۆلار بۆ هەزار دۆلارە، بەڵام تێچووی کرێی خانوو لە سووریا لە ناوچەیەکی ئارامدا لەنێوان 50 بۆ 150 دۆلارە.

باکگراوند: پێشتر وەزیری بەرگریی ئیسرائیل ئامانجی هێرشەکانی بۆ سەر باشووری لوبنان ڕوونکردبووە و ئاماژەی بەوە دابوو، کە دەیانەوێت حیزبوڵڵا لاواز بکەن، تا ئاستێک کە نەتوانێت ببێتە هەڕەشە بۆ سەر ئارامیی باکووری ئیسرائیل و ئاوارە ئیسرائیلییەکانیش بۆ شوێنەکانی خۆیان بگەڕێنەوە.