کۆمیسیۆن: تا ئەمڕۆ 66 پێشێلکاری و سکاڵا تۆمارکراون

ئاڤا نیوز

کۆمیسیۆنی هەڵبژاردنەکانی عێراق دەڵێت، تا ڕۆژی 13ی ئەم مانگە، 66 پێشێلکاری و سکاڵا لەسەر بانگەشەی هەڵبژاردنی پەرلەمانی کوردستان تۆمارکراون.

 

وێنە گەورەکە: یەکشەممەی داهاتوو هەڵبژاردنی پەرلەمانی کوردستان بەڕێوەدەچێت، لە کۆی دوو ملیۆن 899 هەزار و 615 دەنگدەر، دوو ملیۆن و 778 هەزار و 898 کەس کارتی بایۆمەترییان وەرگرتووەتەوە و مافی دەنگدانیان هەیە، 120 هەزار و 717 کەسیش بایۆمەترییان کردووە و تا 15ی ئەم مانگە دەرفەتیان هەیە تا بچن و کارتەکانیان وەربگرنەوە.

 

ڕاگەیێنراوی فەرمی: کۆمیسیۆنی هەڵبژاردنەکانی عێراق بڵاویکردەوە، بۆ هەڵبژاردنی پەرلەمانی کوردستان تائێستا 30 هەزار و 573 چاودێری لایەنەکان، سێ هەزار و 100 چاودێری ناوخۆیی و هەزار و 527 چاودێری نێودەوڵەتی تۆمارکراون، تا ڕۆژی یەکشەممەش 26 پێشێلکاریی و 40 سکاڵا لەسەر ماوەی بانگەشەی هەڵبژاردن تۆمارکراون.

 

ئەوەشی خستوەتەڕو، بۆ گەرەنتیکردنی پاکوبێگەردی هەڵبژاردنەکە، 22 هەزار و 283 کامێرای چاودێریی دادەنرێن، بەجۆرێک لەهەر بنکەیەکی دەنگدان چوار کامێرا و لەهەر وێستگەیەکیش دوو کامێرا دەدانرێت، بۆ چوار ناوەندی وردبینیش 50 کامێرای چاودێری دادەنرێن.