پەیامێک لە ئەمریکاوە لەبارەی هەڵبژاردنی پەرلەمانی کوردستان

ئاڤا نیوز

 

باڵیۆزی ئەمریکا لە عێراق پاڵپشتی وڵاتەکەی بۆ هەڵبژاردنێکی پاک و بێگەرد لە هەرێمی کوردستان دووپاتکردەوە.

 

وێنە گەورەکە: ڕۆژی هەینی 18ـی تشرینی یەکەمی 2024، دەنگدانی تایبەت بۆ هەڵبژاردنی پەرلەمانی کوردستان بەڕێوەچوو، بەپێی ئاماری کۆمیسیۆن، ڕێژەی بەشداریکردن 97% بووە و بڕیارە سبەی یەکشەممەش دەنگدانی گشتیی لەسەرانسەری هەرێمی کوردستان بەڕێوەچێت.

 

ڕاگه‌یێنراوی فه‌رمی: ئەلینا ڕۆمانۆوسکی، باڵیۆزی ویلایەتە یەکگرتووەکانی ئەمریکا لە عێراق لە هەژماری خۆی لە تۆڕی کۆمەڵایەتیی ئێکس نووسیویەتی، " داوای لەسەرجەم پارتە سیاسییەکانی کوردستان و هێزە ئەمنیەکان دەکەم، بۆ سەرکەوتنی پرۆسەی هەڵبژاردن ڕێز لە ڕۆڵی دەزگاکانی ڕاگەیاندن و رێکخراوە مەدەنییەکان بگرن".

 

زانیاریی زیاتر: ڕۆمانۆوسکی داوایکرد هەموو لایەنەکان خۆیان بەدوور بگرن لە "توندوتیژیی و تۆقاندنی خەڵکی".

 

لەلایەکی دیکەوە: ڕێکخراوی پەیامنێران بۆ ماف و گەشەپێدان ڕاگەیێنراوێکی لەبارەی پێشێلکاریی بەرامبەر ڕۆژنامەنووسان لە ڕۆژی دەنگدانی تایبەتدا بڵاوکردەوە کە تیایدا هاتووە، 19 پێشێلکاریی تۆمارکراوە کە زۆرترینیان لە شاری هەڵەبجە بووە.