لە دهۆک دەنگەکانی پارتی بەرزبوونەوە

ئاڤا نیوز

 

دوای بەدەست هەژمارکردنی دەنگەكانی چەند وێستگەیەكی دەنگدان لە سنووری پارێزگای دهۆك، سەدان دەنگ بۆ لیستی 190ی پارتی دیموكراتی كوردستان زیاد دەكات.

 

زانیاریی بەدەستهاتوو: بەپێی ئەو زانیارییانەی دەست ئاڤا نیوز كەوتوون، لە سنووری پارێزگای دهۆك حەفت وێستگە هەبوون كە دەنگەكانیان بەهۆی گرفتی مانگی دەستكرد هەژمار نەكرابوون، ئەو حەفت وێستگەیە لەچوارچێوەی ئەو 26 وێستگەیەن كە كۆمسیۆن تاوەكو ئێستا ئەنجامی دەنگەكانی ڕانەگەیاندووە.

 

زانیاریی زیاتر: ئەو حەفت وێستگەیەی پارێزگای دهۆك، چواریان لە بنكەی قوتابخانەی میدیا لە شاری دهۆكن و یەكێكیان لە ناوچەی بەرۆشكی لە دهۆك و دووانەكەی دیكە لە بەردەڕەش و ئاكرێن، لە ئەنجامی هەژماركردنی دەنگەكانی سێ وێستگە 594 دەنگی دیكە بۆ دەنگەكانی لیستی پارتی دیموكراتی كوردستان لە بازنەی دهۆك زیاد بوو.

 

ئەوەش بزانە: بە زیادبوونی ئەو 594 دەنگە، دەنگەكانی پارتی لە بازنەی دهۆك گەییشتە 401 هەزار 214 دەنگ، بەڵام ئەم زیادبوونە كاریگەریی بۆ زیادبوونی كورسییەكانی حیزبەكە لە بازنەكە نابێت.

 

ئەوەی پێویستە بیزانیت: ئەو سكاڵایانەی لە بازنەی دهۆك تۆمار كراون سەرجەمیان قردێلەی سەوز و زەردن كە تایبەتن بە بەكارهێنانی مۆبایل و ڕیكلامی لایەنی سیاسی كە هیچ كاریگەرییان لەسەر زیادبوون و كەمبوونی ژمارەی دەنگەكان نابێت.