ڕاوێژکارێکی سوودانی: عێراق بەشێکە لە میحوەری ئەمریکا

ئاڤا نیوز

ڕاوێژکارێکی سەرۆکوەزیرانی عێراق ڕایدەگەیێنێ، سیستمی سیاسیی عیراق دوای ساڵی 2003 و ئابوورییەکەی بە ئەمریکاوە بەستراوەتەوە و ئێستا عێراق بەفەرمی بەشێکە لە میحوەری ئەمریکا.

وێنە گەورەکە: حکومەتی عێراق پەیوەست بە گرژییەکانی فەڵەستین و لوبنان، داوای چارەسەری دیپلۆماسی و ڕاگرتنی هێرشەکانی ئیسرائیل دەکات، هاوکات لە ئاستی مرۆییشدا هەوڵەکانی بۆ گەیاندنی هاوکاری بۆ خەڵکی ئەو دوو وڵاتە چڕکردووەتەوە.

لێدوانی فەرمی: ئیبراهیم سەمیدعی، ڕاوێژکاری سەرۆکوەزیرانی عێراق لە چاوپێککەوتنێکدا ڕایگەیاندووە، 90%ی سەرکردەکانی چوارچێوەی هەماهەنگی دژی جەنگن و تەنها بەشێکی کەم لە گرووپە چەکدارەکان کە ئەوانیش بریتین لە گرووپەکانی نوجەبا و کەتائیبی حزبووڵا لە گرژییەکانی ناوچەکەدا بەشدارن.

باسی لەوەش کردووە، ئێستا عێراق بەفەرمی بەشێکە لە میحوەری ئەمریکا بەهۆی ئەوەی سیستمە سیاسی و ئابوورییەکەی بەو وڵاتەوە بەستراوەتەوە. جەختیش دەکاتەوە  سەرۆکوەزیرانی عێراق لە هەوڵەکانی بەردەوامە بۆ ڕاگرتنی گرژییەکانی ناوچەکە بەڕێگەی دیپلۆماسی و دوورخستنەوەی وڵات لە مەترسییەکان.