لەنێوان کوردانی ئێزدی مارەیی بۆ پێنج مسقاڵ زێڕ کەم دەکرێتەوە

ئاڤا نیوز

لەپێناو ئاسانکردنی پرۆسەی هاوسەرگیری، ئەنجوومەنی باڵای ڕۆحانی ئێزدی مارەیی بۆ 25 - 30 گرام، (پێنج بۆ شەش) مسقاڵ کەم دەکاتەوە.

وێنە گەورەکە: چەند مانگێکە نرخی زێڕ ڕۆژ لەدوای ڕۆژ بەرزدەبێتەوە و ئێستا لە بەرزترین ئاستیەتی لە مێژوودا، لە بازاڕەکانی جیهان یەک ئۆنسە بە نزیکەی دوو هەزار و 750 دۆلارە، لە بازاڕەکانی کوردستانیش مسقاڵێک زێڕی عەیار 21 بە نزیکەی 600 هەزار دینارە، ئەمەش پرۆسەی هاوسەرگیری قورس کردووە.

 

چیرۆکی سەرەکی: ئەنجوومەنی ڕۆحانی کوردانی ئێزدی تاوتوێی دەرکردنی بڕیارێک دەکات بەمەبەستی کەمکردنەوەی مارەیی. لە ساڵی 2009 ەوە بە بڕیاری ئەنجوومەنەکە مارەیی بە 75 گرام  زێڕ (15 مسقاڵ زێڕی عەیار 21) دیاریکراوە.

لێدوانی فەرمی: جەهوەر عەلی بەگ، جێگری میری ئێزدییان بە ئاڤا نیوزی ڕاگەیاند: "لیژنەیەک بۆ گفتوگۆکردن لەگەڵ سەرۆک هۆز و سەرۆک عەشیرەتەکانی ئێزدی پێکهێنراوە، بۆ ئەوەی مارەیی بۆ 25 تاوەکو 30 گرام زیڕ کەم بکرێتەوە، هەموو شەقامی ئێزدیش لەگەڵ ئەم بابەتەیە".

 

زانیاریی زیاتر: لە ماوەی دوو هەفتەی داهاتوودا بڕیاری کەمکردنەوەی مارەیی دەدرێت، لەبارەی پابەندبوونی خەڵک بە بڕیارەکە  جەهوەر عەلی بەگ گوتی: "هەر کەسێک پابەند نەبێت لە شەقامی ئێزدیدا مەرغوب نابێت، چونکە لەکاتی مارەکردن سوێند دەدرێن".

ئەمەش بزانە: پێنج گرام زێڕ مسقاڵێکە، ئەگەر مارەیی بۆ 25 بۆ 30 گرام زێڕی عەیار 21 کەم بکرێتەوە، ئەوا دەکاتە پێنج بۆ شەش مسقاڵ.