لە شێخان ژمارەیەک ژن هێرش دەکەنە سەر ماڵێک و دەیسووتێنن

ئاڤا نیوز

 

بەهۆی کێشەی زەویوزارەوە لە کۆمەڵگەی چڕە لە دەشتی ناوکوڕ شەڕ لە نێوان دوو بنەماڵە دروست دەبێت و ماڵێکیش سووتێنرا.

 

وێنە گەورەکە: ئەمڕۆ یەکشەممە 27-10-2024، بەهۆی کێشەی زەویوزار، چەند ژنێک لە کۆمەڵگەی چڕەی سەر بە قەزای شێخان، هێرش دەکەنە سەر ماڵی خاوەن موڵکێک و دەیستووتێنن.

 

لێدوانی فەرمی: سەرچاوەیەکی ئاگادار بە ئاڤا نیوزی ڕاگەیاند: ژمارەیەک ژن هێرش دەکەنە سەر ماڵێک کە بەر لە چەند ڕۆژێک کەسێکیان لە زیندان ئازاد بووە و گەڕاوەتەوە ماڵەوە، دەشڵێت: کێشەکە کۆنە و ماوەی چەند ساڵێکە بەردەوامە.

 

لەلایەکی دیکەوە: سەرچاوەیەکی ئەمنی بە ئاڤا نیوزی گوت: کێشەکە چاوەڕوانکراو بوو، دوای ئەوەی ژنەکان هێرشی سەر ماڵەکەیان کرد، کێشەکە چارەسەر کرا.

 

زانیاریی تایبەت: ئاڤا نیوز زانیویەتی، چەند مانگێک لەمەوبەر لەسەر هەمان کێشە، 7 کەس لە لایەنی خاوەن موڵکەکە دەستگیر کرابوون، بەڵام شەش کەسیان ئازاد کرابوون، بەر لە چەند ڕۆژێک ئەوەی دیکەش ئازاد کرا.

 

باکگراوند: کێشەی ئەو دوو بنەماڵەیە لەسەر زەویوزار بووە و لە چەند ساڵی ڕابردوو چەند جارێک پێکدادانی زۆر بەهێز لەنێوانیان ڕوویداوە و چەند کەسێکیش لە نێوان هەردوولا کوژراون و برینداربوون.