سوودانی داوای ڕێکاری زیاتر بۆ "ڕێکخستنەوەی"ی دەروازەکانی هەرێمی کوردستان دەکات

ئاڤا نیوز

سەرۆکوەزیرانی عێراق دەڵێت، داهاتی دەروازەکان لە ئاستی پێویستدا نییە، داواش دەکات ڕێکاری زیاتر بۆ ڕێکخستنەوەی دەروازەکانی هەرێمی کوردستان بگیرێتەبەر.

وێنە گەورەکە: حکومەتی عێراق لە کۆبوونەوەی ڕۆژی سێشەممەیدا کە هاوکات بوو لەگەڵ تێپەڕبوونی دوو ساڵ بەسەر دەستبەکاربوونیدا، ئاماری پڕۆژە جێبەجێکراوەکانی بڵاوکردەوە و ئاشکرای کرد، بە دوو ساڵ 62%ی کارنامەی حکومەت جێبەجێ کراوە.

لێدوانی فەرمی: محەممەد شیاع سوودانی، سەرۆکوەزیرانی عێراق لە کۆبوونەوەکەدا و پەیوەست بە دەروازەکان وتی: "لە دەروازە سنوورییەکان ڕووبەڕووی کۆمەڵێک ئاستەنگ بووینەتەوە لەگەڵ ئەوەشدا ژمارەیەک چاکسازی گرنگ بۆ باشترکردنی کارەکانیان کراون".

بابەتی سەرەکی: پەیوەست بە دەروازە سنوورییەکانی هەرێمی کوردستان، سەرۆکوەزیران گوتی: "داهاتی دەروازەکان بەگشتی نەگەیشتووەتە ئاستی داواکراو بەتایبەت ئەوەی پەیوەندی هەیە بە  دەروازەکانمان لە هەرێمی کوردستان کە پێویستی بە ڕێکاری زیاتر هەیە بۆ ڕێکخستنەوەیان".

لەلایەکی دیکەوە: بەگوتەی سەرۆکوەزیران ئاستەنگێکی دیکەی دەروازەکانی عێراق و هەرێمی کوردستان بریتییە لە بابەتی یەکخستنی پێناسەی گومرگی کە تائێستا وەک خۆی جێبەجێ نەکراوە.