لە کەرکووک ژن و پیاوێک بەهۆی لافاو گیان لەدەست دەدەن

ئاڤا نیوز

لە کەرکووک بڕێکی زۆر باران باریوە، بەهۆیەوە لە چەند ناوچەیەک لافاو دروست بووە، لە ناحیەی عەباسی ماڵێکی ئاژەڵدار بەر لافاو کەوتووە و بەهۆیەوە ژن و پیاوێک گیانیان لەدەست داوە و نزیکەی 150 سەر مەڕیش تیاچوون.

 
لە پەیامنێرەوە: ڕۆکان مەحموود، پەیامنێری ئاڤا میدیا لە کەرکووک ڕایگەیاند، لە ماوەی 12 کاتژمێردا، لە 09:00ی بەبەیانییەوە تاوەکو 09:00ی شەوی یەکشەممە زیاتر لە 18 ملیلم باران باریوە، بەهۆیەوە لە چەند ناوچەیەک بەتایبەت لە ناحیەی عەباسی لافاو دروست بووە.

زانیاریی زیاتر: ڕۆکان مەحموود وردەکاریی ڕووداوەکەی ناحیەی عەباسی باس کرد و گوتی: لە گوندێکی ناحیەکە پرۆژەیەکی ئاو هەیە بە ناوی پرۆژەی ئاوی زاپ، پرۆژەکە ئاوی تێدایە و ساڵانە دەبێتە هۆی دروستبوونی لافاو، بۆیە ئەمساڵ هۆشداری دراوە دانیشتووانی دەوروبەری ماڵەکانیان چۆڵ بکەن.

ئەوەی پێویستە بیزانیت: ماڵێک لە نزیک پرۆژەکە بەهۆی ئەوەی ئاژەڵدار بوون نەیانتوانیوە ماڵەکەیان چۆڵ بکەن، ئێوارەی ڕۆژی یەکشەممە لافاو دروست بووە و لە ماڵەکەیانی داوە، بەهۆیەوە دوو هاوژین، ژن  و پیاوی ماڵەکە بەر لافاو کەوتوون و گیانیان لەدەست داوە، تەرمی ژنەکە دۆزراوەتەوە و تاوەکو ئێستاش تەرمی پیاوەکە نەدۆزراوەتەوە، هەر بەهۆی لافاوەکە نزیکەی 150 سەر مەڕی ماڵەکە تیاچوون.