بۆ یەکەمجار دوو زانکۆی کوردستان بەشی AI دەکەنەوە

ئاڤا نیوز

بۆ یەکەمجار لەسەر ئاستی کوردستان و عێراق دوو زانکۆی حکومی کوردستان بەشی ژیریی دەستکرد (AI) دەکەنەوە و 59 قوتابی وەردەگرن.

وێنە گەورەکە:  زانکۆی زاخۆ و پۆلیتەکنیکی هەولێر بەشی ژیریی دەستکرد (AI)یان کردووەتەوە، بەشەکە لە ڕیزبەندی بەشە ئەندازیارییەکان هەژماردەکرێت، واتە دەرچووانی ئەم بەشە دەبنە ئەندازیار لە ژیری دەستکرد.

زانیاریی زیاتر: هەردوو زانکۆکە 59 قوتابییان وەرگرتووە، زانکۆی زاخۆ 34 قوتابی وەرگرتووە بە کۆنمرەی 87 بۆ کۆنمرەی 94.2. هاوکات زانکۆی پۆلیتەکنیکی هەولێریش  25 قوتابی وەرگرتووە بە کۆنمرەی 91.3 بۆ کۆنمرەی 94.2.

ئەمەش بزانە: ئەمە یەکەمجارە لە زانکۆ حکومییەکان لەسەر ئاستی کوردستان و عێراق ئەم بەشە کراوەتەوە، هەر ئەمساڵ لە زانکۆی عەین لە عێراق کە زانکۆیەکی تایبەتە، ئەویش کۆلێژی ئەندازیاریی زیرەکی دەستکردی کردووەتەوە.

 

لێدوانە فەرمییەکان: د.ڕەمەزان جەعفەر، یاریدەدەری سەرۆکی زانکۆی زاخۆ بۆ کاروباری قوتابیان و د. دلێر عەبدوڵڵا، بەڕێوبەری تۆماری گشتیی زانکۆی پۆلیتەکنیکی هەولێر  بە ئاڤا نیوزیان گوت، بەهۆی گرنگیی ژیری دەستکرد لەسەر ئاستی جیهان ئەم بەشەیان کردووەتەوە، قوتابییەکانیش بە هەردوو سیستەمی زانکۆلاین و پارالێڵ وەرگیراون.

 

باکگراوند: ئەمڕۆ یەکشەممە وەزارەتی خوێندنی باڵا و توێژینەوەی زانستی ئەنجامی زانکۆڵاینی ڕاگەیاند، 53 هەزار و 79 کەس لە زانکۆ و پەیمانگە حکومییەکان وەرگیراون، نزیکەی 13 هەزار و 229 کورسیش بەتاڵ ماون و ئەوانیش هەموویان وەردەگیرێن.