ئەردۆغان ترەمپ بانگهێشتی تورکیا دەکات

ئاڤا نیوز

 

ڕەجەب تەیب ئەردۆغان، سەرۆککۆماری تورکیا بانگێشتی دۆناڵد ترەمپ، سەرۆکی هەڵبژێردراوی ئەمریکا بۆ تورکیا دەکات و داواشی لێدەکات بانگێشتنامەکەی ڕەت نەکاتەوە.

 

وێنە گەورەکە: تورکیا لە سەردەمی ئیدارەی ترەمپ لە ساڵانی 2016 تا 2020 پەیوەندییەکانی لەگەڵ ئەمریکا باش بوو، بە دووبارە دەست بەکاربوونەوەی ترەمپ، ئەردۆغان دەیەوێت پرسی هاوکارییەکانی ئەمریکا بۆ  یەپەگە لە سووریا، ناردنی چەک بۆ ئیسرائیل لەگەڵ ترەمپ باس بکات و ڕازی بکات بەوەی هاوکارییە سەربازییەکان بۆ یەپەگە ڕابگرێت.

  

لێدوانی فەرمی: ئەردۆ‌غان بۆ ڕۆژنامەنووسان قسەی کرد و ڕایگەیاند: "ئێمە لە ماوەی سەرۆکایەتیی پێشوودا لەگەڵ بەڕێز ترەمپ پێکەوە کارمان کردووە، هەرچەندە ناوبەناو بیرکردنەوەمان جیاواز بووە، بەڵام هاوبەشی نمونەیی تورکیا و ئەمریکا مشتومڕی لەسەر ناکرێت".

 

لەلایەکی دیکەوە: سەرۆککۆماری تورکیا وەسفی بە توانایی ترەمپی  کرد بەوەی دوای هەوڵێکی زۆر توانی ببێتەوە سەرۆکی ئەمریکا و ئاماژەی بۆ ئەوە کرد "کەم سەرۆک هەیە بتوانێت ئەو هەموو ئاستەنگە تێپەرێنێت و جارێکی دیکە کورسی سەرۆکایەتیی وەربگرێتەوە".

 

زانیاریی زیاتر: تورکیا هیوادارە ترەمپ شەڕی ڕۆژهەڵاتی ناوەڕاست بوەستێنێت، هەروەها ئەگەر ناردنی چەک بۆ ئیسرائیل بوەستێنێت، دەستپێکێکی باش دەبێت.