سەرژمێریی کاریگەریی لەسەر بەرنامەی تواناسازی دەبێت

ئاڤا نیوز

ساڵانە بەگوێرەی بەرنامەی تواناسازی عێراق، ژمارەیەک قوتابی لە هەرێمی کوردستان ڕەوانەی دەرەوە دەکرێن، بەرپرسێکی وەزارەتی خوێندنی باڵا و توێژینەوەی زانیستیش دەڵێت، سەرژمێری کاریگەریی لەسەر ئەو ڕێژەیە دەبێت کە بۆ هەرێمی کوردستان دیاریکراوە.

 

وێنە گەورەکە: بەگوێرەی ئەو بەرنامەیەی کە حکومەتەکەی محەممەد شیاع سوودانی، سەرۆکوەزیرانی عێراق لە چوارچێوەی تواناسازی دایناوە، ساڵانە ژمارەیەک قوتابی بۆ خوێندن دەنێردرێنە دەرەوە و خەرجییەکانیان لەسەر حکومەتی عێراق دەبێت.

 

لێدوانی فەرمی: د.یاسین ساڵح، بەڕێوەبەری گشتیی نێردراوان و پەیوەندییە ڕۆشنبیرییەکان لە وەزارەتی خوێندنی باڵا و توێژینەوەی زانستی، بە ئاڤا نیوزی ڕاگەیاند: لەچوارچێوەی بەرنامەی تواناسازی کە سەرۆکوەزیرانی عێراق دایناوە، ساڵانە ژمارەیەک قوتابی بۆ خوێندن ڕەوانەی دەرەوە دەکرێن،  12٪ی ئەو ڕێژەیەش کە 100 قوتابین بەر هەرێمی کوردستان دەکەوێت، ئەگەر سەرژمێریی بکرێت کاریگەری لەسەر ئەم ڕێژەیە دەبێت.

 

لەبارەی دەستپێکردنەوەی بەرنامەی تواناسازی حکومەتی هەرێمی کوردستان، د.یاسین ساڵح دەڵێت: بەهۆی ڕەوشی داراییەوە بەرنامەکە ڕاگیراوە، ئومێدمان هەیە لە ساڵی 2025 دۆخەکە ڕەوشی ئابووری کوردستان سەقامگیر دەبێت، ئەو کاتە دەست بە جێبەجێکردنەوەی بەرنامەی تواناسازی دەکەینەوە.

 

زانیاریی بەدەستهاتوو: ئێستا سێ هەزار قوتابی کورد لە دەرەوەی وڵات دەخوێنن، تەنیا لە ساڵی 2024 دا نزیکەی 500 قوتابی بۆ خوێندنی بەکالۆریۆس و ماستەر و دکتۆرا چوونەتە دەرەوە.

 

زانیاریی زیاتر: بە چوار شێواز قوتابی بۆ خوێندن دەنێردرێتە دەرەوە، کە بەم شێوازەیە:

- تەواوی خەرجییەکان لەسەر خودی قوتابی دەبێت.
- کارمەندانی حکومی کە ساڵانە بە پێی پلان مۆڵەتیان پێدەدرێت و حکومەت مووچە بنەڕەتیەکانیان بۆ خەرج دەکات.
-  زەمالاتی وڵاتان کە ساڵانە دەیبەخشن بە کوردستان، هەموو خەرجیەکانی خوێندن لەسەر ئەو وڵاتانە دەبێت.
- ئەوانەی لە ڕیگەی زەمالاتی سەرۆکایەتی حکومەتی عێراق وەردەگیرێن، حکومەتی عێراق گشت خەرجیەکان دەگریتە ئەستۆ.

 

ئەوەی پێویستە بیزانیت: قوتابییان زیاتر بۆ خوێندن ڕوو لە بەریتانیا، ئەمریکا، وڵاتانی ئەورووپا، تورکیا، ئێران، میسر دەکەن، بەشێک لەو قوتابییانەی لەسەر حسابی خۆیان دەخوێنن زیاتر ڕوو لە ئێران دەکەن.