وەزیری سامانە سرووشتییەکان: سەرەتای ساڵی داهاتوو دەست بە هەناردەکردنەوەی نەوت دەکرێت

ئاڤا نیوز

 

لێکتێگەیشتن و لێک نزیکبوونەوە لە نێوان هەولێر و بەغدا هەیە، دوایین پێشهات ئەوەیە وەزارەتی سامانە سرووشتییەکانی هەرێمی کوردستان و وەزارەتی نەوتی عێراق لەسەر ئەوە ڕێککەوتوون کۆمپانیایەکی ڕاوێژکاریی بێلایەن وردبینی دیاریکردنی تێچوو بکات، لەماوەی 60 ڕۆژدا بڕەکە دیاریدەکات.

 

وێنە گەورەکە: دوای زنجیرەیەک کۆبوونەوە لەسەر دەستپێکردنەوەی نەوتی هەرێمی کوردستان، سەرەتای ئەمساڵ بە واژۆی وەزیری نەوت، پلاندانان و دارایی عێراق بڕی 20.6 دۆلاری بۆ تێچووی دەرهێنان و گواستنەوەی هەر بەرمیلێک نەوت دیاریکرا، ماوەتەوە سەر ئەوەی پێشنیازەکە بگەڕێنرێتەوە پەرلەمان، بۆ ئەوەی دەنگی لەسەر بدرێت و پەسەند بکرێت، ئەمەش دوای وردبینی و هەڵسەنگاندنی کۆمپانیایەکی ڕاوێژکاریی لەسەر کێڵگە نەوتییەکانی هەرێمی کوردستان دەکرێت.

 

لێدوانی فەرمی: کەمال محەممەد، وەزیری سامانە سرووشتییەکانی هەرێمی کوردستان بەوەکالەت لە گەشتیی هەواڵەکانی کاتژمێر 07:00ـی ئاڤا بەشداریکرد و ڕایگەیاند: پێشبینی دەکەین تاوەکو کۆتایی ئەمساڵ ڕێککارەکانی هەناردەکردنەوەی نەوتی هەرێمی کوردستان تەواوبن و سەرەتای سالێ نوێ دەست بە پرۆسکە بکرێتەوە.

 

ئەوەی پێویستە بیزانیت: بەپێی یاسای بودجە تێچووی دەرهێنان و گواستنەوەی نەوت بە شەش دۆلار دیاریکراوە، دەبێت لە پەرلەمان ئەو خاڵە هەموار بکرێتەوە و لە شەش دۆلارەوە زیادبکرێت بۆ سەرووی 20 دۆلار، بەگوێرەی ڕێککەوتنی نوێی نێوان هەولێر و بەغدا لە قۆناغی یەکەم 16 دۆلار بۆ کۆمپانیاکانی دەرهێنانی نەوت خەرج دەکرێت.

 

زانیاریی زیاتر: سەبارەت بە دیاریکردنی بڕێ تێچووی دەرهێنانی هەر بەرمیلێک نەوت لە کێڵگەکانی هەرێمی کوردستان، وەزیری نەوت ئاماژەی بەوەدا کە لە نێوان 16 بۆ 20 دۆلار دەبێت.