وەزیری پێشمەرگە: بۆ بەرەنگاربوونەوەی هەر مەترسییەک ئامادەین

ئاڤا نیوز

 

وەزیری پێشمەرگە لەبارەی تەقینەوەی خورماتوو و جموجۆڵی چەکدارانی داعش لە سنووری ماددەی 140 دڵنیایی دەدات و دەڵێت: پێشمەرگە بۆ ڕووبەڕووبوونەوەی هەر مەترسی و هەڕەشەیەک ئامادەیە.

 

چیرۆکی سەرەکی: کاتژمێر 09:00ـی بەیانی ئەمڕۆ، لە سنوری خورماتوو  بۆمبێکی چێنراو بە کاروانێکی هاوبەشی پێشمەرگە و سوپای عێراقدا تەقییەوە، بەهۆیەوە سێ ئەفسەر شەهید بوون و سێ سەربازیش بریندار بوون.

 

لێدوانی فەرمی: شۆڕش ئیسماعیل، وەزیری پێشمەرگە ڕایگەیاند، تەقینەوەکە لە کاتی کێوماڵکردنی ناوچەیەکی بەرفراوانی ئاسایشی هاوبەشدا بووە. جەختیش دەکاتەوە "جموجۆڵ و مەترسیی گرووپی تیرۆریستی داعش و تاریکپەرستان هێشتا کۆتایی نەهاتووە، بەتایبەت لەو ناوچانەی کە بۆشایی ئەمنین لە نێوان هێزی پێشمەرگە و سوپای عێراقدا".

 

لەلایەکی دیکەوە: وەزیری پێشمەرگە خەڵکی کوردستان دڵنیا دەکاتەوە کە هێزی پێشمه‌رگه له‌ئاماده‌باشی تەواودایە بۆ پاراستنی خەڵک و خاکی کوردستان و لەناوبردنی تیرۆر و تیرۆریستان و ڕووبەڕووبوونەوەی هەر مەترسییەک، گیانفیدایانە ئامادەیە بەردەام دەبێت بۆ کێوماڵکردنی ئەو ناوچانە."