بەریتانیا لە بارەی کۆچبەرانەوە داوایەک لە هەرێمی کوردستان دەکات

ئاڤا نیوز

 

حکومەتی بەریتانیا گفتوگۆ لەگەڵ حکومەتی هەرێمی کوردستان، تورکیا و ڤێتنام دەکات بۆ ڕێگەگرتن لە کۆچی نایاسایی کۆچبەران بە وڵاتەکە.

 

وێنە گەورەکە: بەهۆی بەرزبوونەوەی ڕێژەی کۆچبەران بۆ وڵاتانی ئەوروپا، بەریتانیا ڕێکاری نوێ بۆ ڕێگەگرتن لە لێشاوی کۆچبەران بۆ وڵاتەکەی دەگرێتەبەر و هەرێمی کوردستان بەشێک دەبێت لەم ڕێکارانە.

 

بڵاوکراوەی فەرمی: ڕۆژنامەی سەندەی تایمزی بەریتانی، ڕاپۆرتی لەسەر شێوازێکی نوێی حکومەتی بەریتانیا داوە کە هاوشێوەی ئیتاڵیا بۆ ڕاگرتنی کۆچکردنی نایاسایی بۆ نێو وڵاتەکە، گرتووەتە بەر.

 

زانیاریی زیاتر: بەپێی ڕاپۆرتی ڕۆژنامەکە، حکومەتی بەریتانیا تا کۆتایی ئەمساڵ لەگەڵ حکومەتی هەرێمی کوردستان، تورکیا و ڤێتنام ڕێکدەکەوێت، هاوکات بودجەیەکی 100 ملیۆن یۆرۆ بۆ کەمکردنەوە و ڕاگرتنی شەپۆلی کۆچبەران بۆ وڵاتەکە تەرخان دەکات.

 

ئەمەش بزانە: لە ڕاپۆرتەکەدا هاتووە، حکومەتی بەریتانیا هەوڵی جددیی دەدات لەوەی هانی حکومەتی هەرێمی کوردستان، تورکیا و ڤێتنام بدات، تاوەکو لە ڕێگەی پارەکەوە هانیان بدات هەلومەرجی باشتر بۆ هاووڵاتیانیان بڕەخسێنێت و ڕێگە لە کۆچکردنیان بگرێت.