لە شێخان کێشەی تەکنیکی بۆ پڕۆسەی سەرژمێری دروست دەبێت

ئاڤا نیوز

 

ماوەی سێ ڕۆژە پڕۆسەی سەرژمێری گشتی لە عێراق و هەرێمی کوردستان بەردەوامە، لە قەزای شیخان گرفتی تەکنیکی بۆ پڕۆسەکە دروستبووە تەنها چەند کاتژمێرێکیش ماوە بۆ تۆمارکردنی ناوی دانیشتووان.

 

وێنە گەورەکە: لە کاتێکدا ئەمڕۆ کۆتا ڕۆژی قۆناغی تۆمارکردنی زانیاریی خێزانەکانە لە سەرژمێری، ئەمڕۆ سێشەممە کۆد و ناوی چوونە ژوورەوەی بژمێرەکان گەیشتووەتە قەزای شێخان و گرفتی تەکنیکیش لە کارکردنیان دا هەیە.

 

لێدوانی فەرمی: سالم خدر حەجی، بەڕێوەبەری ئاماری شێخان بە ئاڤا نیوزی ڕاگەیاند: ئەمرۆ ناو و ووشەی نهێنی بژمێرەکان بۆ ناحیەکانی باعەدرێ و زێلکان، ناحیەی شێخان لە سنووری ماددەی 140 گەیشتووەتە قەزاکە، هاوکات کێشەی تەکنیکی لە یوزەرەکان هەیە و کار ناکەن.

 

زانیاریی زیاتر: بەڕێوەبەری ئاماری شێخان دەڵێت: ئەمڕۆ کۆتا ڕۆژی تۆمارکردنی خێزانەکانە، هاوکات ئێمە شەڕ لەگەڵ کات دەکەین، بۆ ئەوەی ناوەکان چالاک بکرێن و دەست بە پرۆسەکە بکەین، تاوەکو تەواوی هاونیشتمانییان لەو سنوورە تۆمار بکەین.

 

ئەوەی پێویستە بیزانیت: ئەمڕۆ کۆتا ڕۆژی قۆناغی تۆمارکردنی زانیاریی خێزانەکانە، لە کاتژمێر 12 ی ئەمشەوەوە قەدەغەی هاتوچۆ ڕادەگەیێنرێت و وردبینکردن لە سەرژمێری دەستپێدەکات.