خەمیس خەنجەر: عێراق بەردەوام زۆنی قەیران و ئاڵنگاری بووە

ئاڤا نیوز

 

خەمیس خەنجەر، سەرۆكی هاوپەیمانی سیادە، ڕایدەگەیەنێت، لە دوای سایكس بیكۆوە، عێراق بەردەوام ناوچەی دروستبوونی قەیران و ئاڵنگاری و کێشە بووە.

 

وێنە گەورەكە: لە ڕۆژی دووەمی كۆنفڕانسی ئاشتی و ئاسایشی ڕۆژهەڵاتی ناوەڕاست 'مێپس2024'، ژمارەیەك پانێڵ و دیدار بە بەشداری سەركردە و كەسایەتیەكانی هەرێمی كوردستان، عێراق و جیهان بەڕێوەچوو.

 

لێدوانی فەرمی: خەمیس خەنجەر، سەرۆكی هاوپەیمانی سیادە، لەمیانی كۆڕبەندەكە ڕایگەیاند، "قسەكان زۆر دووبارە بوونەتەوە، پێویستە بەكردار هەنگاو بنێین، دیموكراتیمان لەدەستداوە، گەندەڵیمان هەبووە، نەبوونی سیستمی دادوەریمان هەبووە، لاوازیی دامەزراوەکانی دەوڵەتمان هەبووە."

 

خەمیس خەنجەر ئاماژەی بەوەشكرد، ئەو گرفتانەی بەرۆكی ناوچەی ڕۆژهەڵاتی ناوەڕاستی گرتووە، ڕەنگدانەوەی كێشەیەكی قووڵترن، كە كێشەی حكومڕانی و هەرێمایەتییە، كە لە دوای شەڕی یەكەمی جیهانی و ڕووخانی دەوڵەتی عوسمانییەوە، سنووری وڵاتانی ناوچەكە بەگوێرەی بەرژەوەندیی زلهێزەکانی ئەوکات داڕێژران و لەسەر بنەمای هەندێک ڕێککەوتنی نهێنی بووه. گەلانی ناوچەکه سەبارەت به داڕشتنی سنوورەکان هیچ پرسێکیان پێ نەکرا و ویستی گەلان لەبەرچاو نەگیران.