حوسییەكان كەشتییەكی نەوتهەڵگری ئەمریكا بە ئامانج دەگرن

ئاڤا نیوز

وەک وەڵامێک بۆ ئەو هێرشانەی شەوی ڕابردوو ئەمریکا و بەریتانیا بە هاوبەشی کردیانە سەر چەند ئامانجێکی حوسییەکان، حوسییەکان کەشتییەکی نەوتهەڵگری ئەمریکایان لە کەنداوی عەدەن کردە ئامانج.

 

ئەوەی پێویستە بیزانیت: شەوی شەممە هەریەک لە ئەمریکا و بەریتانیا بە هاوبەشی 18 پێگەی حوسییەکانیان لە یەمەن کردە ئامانج، کە هەریەک لە کۆگای چەک و مووشەک و فڕۆکەی بێ فڕۆکەوان و سیستەمی بەرگریی ئاسمانیی و هێلیکۆپتەری حوسیەکانی لەخۆگرتبوو، هەر دوای هێرشەکە حوسییەکان هەڕەشەی تۆڵەکردنەوەیان کرد.

 

زانیاری زیاتر: حوسییەکان لە ڕاگەیێنراوێکدا گوتیان کەشتییەکی نەوتهەڵگریان لە کەنداوی عەدەن کردووەتە ئامانج کە ئاڵای ئەمریکای هەڵکردووە و خاوەنداریەکەشی بۆ ئەمریکا دەگەڕێتەوە، چەند کەشتییەکی جەنگیی ئەمریکاش لە ناوچەکە بە فڕۆکەی بێ فڕۆکەوان هێرشیان کراوەتەسەر.

 

باکگراوند: لەگەڵ دەستپێکردنی شەڕی نێوان ئیسرائیل و حەماس، لە مانگی 11ـی ساڵی ڕابردووەوە حوسییەکان 45 جار هێرشیان کردووەتە سەر چەند کەشتییەکی سەربازی و مەدەنی لە کەنداوی عەدەن و دەریای عەرەب، لەبەرامبەریشدا ئەمریکا و بەریتانیا و هاوپەیمانەکانیان چەندین پێگەی حوسیەکانیان کردووەتە ئامانج.