شاندی یەکێتی لە سلێمانی لەگەڵ یەکگرتوو و گۆڕان کۆدەبێتەوە

ئاڤا نیوز

 

شاندی دانوستاندنکاری پارتی گەڕاونەتەوە هەولێر و شاندی یەکێتی نیشتمانی کوردستان لە سلێمانین و بڕیارە ئەمڕۆ لەگەڵ یەکگرتووی ئیسلامی  و بزووتنەوەی گۆڕان کۆببنەوە.

 

وێنە گەورەکە: ماوەی دوو ڕۆژە شاندی پارتی و یەکێتی بە جیا سەردانی لایەنەکان دەکەن بە ئامانجی دروستکردنی هەماهەنگی بۆ پێکهێنانی کابینەی دەیەمی حکومەتی هەرێمی کوردستان، دوێنی شاندی پارتی لە سلێمانی لەگەڵ نەوەی نوێ و بزووتنەوەی گۆڕان کۆبووەوە و شاندی یەكێتیش لە هەولێر سەردانی کۆمەڵی دادگەریان کرد، ئەمڕۆش کۆبوونەوەکان درێژەیان دەبێت.

 

زانیاریی تایبەت: بەگوێرەی زانیارییەکانی ئاڤا دوانیوەڕۆی ئەمڕۆ پێنچشەممە، شاندی یەكێتی بە سەرۆکایەتی قوباد تاڵەبانی سەردانی یەکگرتووی ئیسلامی کوردستان و بزووتنەوەی گۆڕان دەکەن، گفتوگۆ لەبارەی هەنگاوەکانی پێکهێنانی حکومەتی داهاتوو دەکەن.

 

لێدوانی فەرمی: د.موسەننا ئەمین، ئەندامی سەرکردایەتی یەکگرتوو بە ئاڤا نیوزی گوت، "هەر لایەنێک بیەوێت سەردانمان بکات پێشوازی لێدەکەین، بەڵام هەڵوێستی خۆمان ناگۆڕین و بەشداری لە کابینەی داهاتووی حکومەتی هەرێمی کوردستان ناکەین."

 

لەلایەکی دیکە: بزووتنەوەی گۆڕان یەک کورسی لە خولی شەشەمی پەرلەمانی کوردستان بەدەستهێناوە، هەڵوێستی خۆی لەبارەی بەشداریکردن لە کابینەی داهاتوو یەکلایی کردووەتەوە و  بەشداری لە حکومەتی داهاتوودا ناکەن.