ئەمساڵ حكومەت سەرپەرشتیی ئاهەنگی نەورۆز لە ئاکرێ دەکات

ئاڤا نیوز

جیاواز لە ساڵەكانی ڕابردوو، بڕیارە ئەمساڵ لەلایەن حكومەتی هەرێمی كوردستانەوە كارەكانی ئاهەنگ و چالاكییەكانی نەورۆز لە ئاكرێ بەڕێوەببرێت.

بۆچی گرنگە: ئەم هەنگاوەی حكومەت هۆكارێكە بۆ باشتر و فراوانتربوونی كار و چالاكییەكانی نەورۆز لە ئاكرێ، تا ژمارەیەکی زیاتر لە گەشتیاران ڕووی تێبكەن.

لێدوانی فەرمی: مەردان خدر، بەرپرسی لقی نۆی پارتی لە ئاكرێ بە ئاڤا نیوزی گوت: ئاگاداركراوینەتەوە كە ئەمساڵ لەسەر ئاستی باڵا و بە فەرمی حكومەت بەشداری لە كارەكانی و چالاكییەكانی نەورۆزدا دەكات و بەڕێوەی دەبات.

زانیاريی زیاتر: بۆ ئەمساڵ پێنج گرووپی خۆبەخش  ئامادەكاريی بۆ نەورۆز دەكەن، بڕیارە زیاتر لە هەزار مەشخەڵی ئاگر بۆ سەر قەڵاكانی ئاكرێ ببرێن و ئاگری نەورۆز دابگیرسێنرێت.

لەلایەكی دیكەوە: بڵند ڕەزا، سەرۆكی شارەوانی ئاكرێ بە ئاڤا نیوزی گوت: كار لەسەر فراوانكردنی "سەرێ گری" دەكرێت كە ئاهەنگەكانی نەورۆزی لەسەر بەڕێوەدەچن، جگە لەوە ئەمساڵ گەڕەكە كۆنەكان و قشلی ئاكرێ بە ڕووناكی و ئاگر دەڕازێنەوە.