نوجەبا تووندی دەكات و حەكیمیش هێوری دەكاتەوە

ئاڤا نیوز

بەپێچەوانەی ئەو هەڕەشانەی گروپی نوجەبا دەیکات، عەمار حەکیم سەرۆکی ڕەوتی حیکمە دەیەوێت گرژی گروپە چەکدارەکان و ئەمریکا لەعێراق کەم بکاتەوە.

 

بۆچی گرنگە: لەعێراق جاروبار هێرش دەکرێتە سەر هێزەکانی هاوپەیمانان، ئەمریکاش تائێستا چەندین جار چەند گروپێکی نزیک لە ئێرانی کردووەتە ئامانج، بەشێک لەو گروپانە هێرشەکانیان بۆ سەر ئەمریکا ڕاگرتووە و بەشێکیان پابەند نین.

ڕاگەیێنراوی فەرمی: عەممار حەکیم، سەرۆکی ڕەوتی حیکمە لەگەڵ ئەلینا رۆمانۆوسکی باڵیۆزی ئەمریکا لە عێراق کۆبووەوە سەرکۆنەی هەوڵەکانی تێکدانی سەقامگیری و ئاسایشی عێراقی کرد، لەڕێگەی بەکارهێنانی چەکەوە، پشتیوانی خۆی بۆ هێزە ئەمنییەکان دووپات کردەوە بۆ دەستگیرکردنی ئەو کەسانەی ئەو تاوانانە دەکەن.

لەلایەکی دیکەوە: ئەلینا رۆمانۆوسکی باڵیۆزی ئەمریکا لەبەغدا لە تۆڕی کۆمەڵایەتی ئێکس نووسیویەتی: لەگەڵ عەمار حەکیم دۆخی ئێستای هەرێمیمان تاوتوێ کرد، باسی داهاتووی هاوبەشی ئەمنی بەردەواممان کرد لەگەڵ ئەنجامی هەڵبژاردنی ئەنجوومەنی پارێزگاکان.

زانیاریی زیاتر: ئەم کۆبوونەوەیە دوای ڕۆژێک بوو لە راگەیێنراوێکی ئەکرەم کەعبی ئەمینداری گشتی بزووتنەوەی نوجەبا لە تۆڕی کۆمەڵایەتی ئێکس کە هەڕەشەی لە هێزەکانی ئەمریکا کردوو گوتی، ئەم بێدەنگیەیان و راگرتنی هێرشەکانیان ئارامی پێش گەردەلوولە.