نێچیرڤان بارزانی و گويدۆ كرۆسێتۆ مه‌ترسييه‌كانى سه‌رهه‌ڵدانه‌وه‌ى داعش تاوتوێ دەکەن

ئاڤا نیوز

 

نێچیرڤان بارزانی، سەرۆکی هەرێمی کوردستان لە هەولێر پێشوازیی گويدۆ كرۆسێتۆ، وەزیری بەرگریی ئیتاڵیا کرد و لەمیانەی کۆبوونەوەیاندا کۆمەڵێک پرس تاوتوێ کران.

 

چیرۆکی سەرەکی: ئەمڕۆ سەرۆکی هەرێمی کوردستان پێشوازی لە وەزیری بەرگریی ئیتاڵیا کرد، هاوکات باس لە هاوکاری هاوبه‌شى سه‌ربازى و ئه‌منيى ئيتاڵيا له‌گه‌ڵ عێراق و هه‌رێمى كوردستان، پشتگيرى و ڕۆڵى هێزه‌كانى ئيتاڵيا له‌ به‌ره‌نگاربوونه‌وه‌ى تيرۆر، دۆخى عێراق و هه‌رێمى كوردستان گفتوگۆ کران.

 

ڕاگەیێنراوی فەرمی: بە گوێرەی ڕاگەیێنراوی سەرۆکایەتیی هەرێمی کوردستان، نێچيرڤان بارزانى، پێزانينی بۆ پشتگيرى و هاوكاريى ئيتاڵيا بۆ عێراق و هه‌رێمى كوردستان له‌ هه‌موو بواره‌كان، به‌تايبه‌تى له‌ به‌ره‌نگاربوونه‌وه‌ى تيرۆر و تێكشكاندنى داعشدا دووپاتكرده‌وه‌، هاوکات ئاماده‌يى و خواستى هه‌رێمى كوردستانى بۆ بره‌ودانى زياتر به‌ هاريكاريى هاوبه‌ش، پاراستنى ئارامى و سه‌قامگيرى له‌ ناوچه‌كه‌دا ده‌ربڕى.

 

لەلایەکی دیکەوە: ئيتاڵيا وه‌ك هاوبه‌شێكى گرنگ، به‌ بايه‌خه‌وه‌ له‌ په‌يوه‌ندييه‌كانى له‌گه‌ڵ عێراق و هه‌رێمى كوردستاندا ده‌ڕوانێت، پشتگيرى و هاوكاريييه‌كانى به‌رده‌وام ده‌بێت، هاوکات ستايشى ڕۆڵى پێشمه‌رگه‌ له‌ شه‌ڕى دژى تيرۆر، تێكشكاندنى داعشدا كرد و ڕۆڵ و پێگه‌ى هه‌رێمى كوردستانى له‌ ناوچه‌كه‌دا به‌رز دەنرخێنێت.

 

ئەوەی پێویستە بیزانیت: هه‌ردوولا باسيان له‌ هه‌وڵه‌كانى خۆ ڕێكخستنه‌وه‌ى داعش كرد، هاوڕابوون لەسەر ئەوەی‌ هێشتا ئەو ڕێکخراوە مه‌ترسييه‌كى ڕاسته‌قينه‌يه‌ و هه‌‌ڕه‌شه‌یە له‌سەر ئاسايش، سه‌قامگيريى عێراق و سووريا و ناوچه‌كه‌، بۆيه‌ به‌رده‌واميى پشتگيريى هاوپه‌يمانيى نێوده‌وڵه‌تيیان بۆ ناوچەکە، به‌ پێويستزانى و جه‌ختيان له‌ گرنگيى تێوه‌نه‌گلانى عێراق له‌ كێشه‌ و ئاڵۆزييه‌كانى ناوچه‌كه‌ كرده‌وه‌.

 

ئەمەش بزانە: دوايين پێشهاته‌كانى دۆخى ناوچه‌كه‌، به‌تايبه‌تى گۆڕانكارييه‌كانى سووريا و كاريگه‌رييه‌كانى له‌گه‌ڵ چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه‌ بوو.