زانیاریی نوێ لە سەر کوشتنی هەنیە ئاشکرا دەکرێت

ئاڤا نیوز

کەناڵی 12ـی ئیسرائیل لە چەند سەرچاوەیەکی ئاگادارەوە زانیاریی نوێ سەبارەت بە تیرۆرکردنی ئیسماعیل هەنیە، سەرۆکی پێشووی مەکتەبی سیاسیی حەماس، بڵاو دەکاتەوە. 

 

زانیاریی بەدەستهاتوو: بەگوێرەی ڕاپۆرتەکە ئامێری ساردکەرەوەی ئەو ژووری میوانخانەیەی کە هەنیە لە تاران تیایدا مابوویەوە کێشەی هەبووە و هەنیە ویستوویەتی ژوورەکەی بگۆڕێت، کە ئەگەر وای بکردایە ئیدی پلانی تیرۆرکردنەکەی دەشێوا، ئەمەش لەبەر ئەوەی ئیسرائیل بۆمبێکی لە ژوورەکەی هەنیەدا دانابوو. بەڵام بەشی چاککردنەوەی میوانخانەکەی سوپای پاسداران لە تاران کێشەکەی بۆ چارەسەر دەکەن و ئامێرەکەی بۆ چاک دەکەنەوە بۆیەوە هەنیە ژوورەکەی ناگۆڕێت و پلانەکەی ئیسرائیل سەردەگرێت. 

 

زانیاریی زیاتر: بەپێی سەرچاوەکان، ئیسرائیل نەیویستووە لە قەتەر هەنیە تیرۆر بکات، بۆ ئەوەی کاریگەریی نەرێنی لە سەر دانوستانەکانی ئاگربەست و بەردانی بارمتەکان نەبێت؛ بۆیە بیر لەوە کراوەتەوە لە تاران، تورکیا یان مۆسکۆ تیرۆر بکرێت بەو پێیەی سەردانی ئەو وڵاتانەی دەکرد، بەڵام لە کاردانەوەی ئەردوغان و پووتینیش ترسیان هەبووە، بۆیە تارانیان بە باشترین شوێن بۆ تیرۆرکردنی هەنیە زانیوە. 

 

لەلایەکی دیکە: دوای ڕووداوەکە ئیسماعیل قائانی، فەرماندەی سوپای قودس بە عەلی خامنەیی ڕێبەری باڵای ئێران دەڵێت کە هەنیە بە مووشەک کراوەتە ئامانج و هەر لەبەر ئەم زانیارییەش بووە کە بڕیار دراوە بە مووشەک هێرش بکرێتە سەر ئیسرائیل.

 

ئەوەی پێویستە بیزانیت: چەند ڕۆژ لەمەوبەر، ئیسرائیل کاتز، وەزیری بەرگریی ئیسرائیل، بە ئاشکرا دانی بەوەدا نا کە ڕۆژی 31ـی تەمووزی ئەمساڵ وڵاتەکەی هەنیەی لە تاران کوشتووە. ئەمەش کاتێک بوو کە هەنیە بۆ بەشداریکردن لە ڕێوڕەسمی سوێندخواردنی مەسعود پزیشکیان وەک سەرۆککۆماری ئێران سەردانی تارانی کردبوو.