داواکارییەکی ئەندامێکی ئەنجوومەنی پارێزگای نەینەوا بۆ پاشەکشێی پێشمەرگە کاردانەوەی لێدەکەوێتەوە

ئاڤا نیوز

 

ئەندامێکی کۆتای ئەنجوومەنی پارێزگای نەینەوا کە ئێزیدییە و نزیکە لە حەشدی شەعبی، لە چاوپێکەوتنێکدا داوا لە سەرۆکوەزیرانی عێراق دەکات چارەسەری دۆخی ئەو سنوورە 35 کیلۆمەترییە بکات کە لەژێر دەسەڵاتی پێشمەرگەیە بۆ پاراستنی و دوورخستنەوەی لە مەترسییەکانی سووریا، سەرۆکی لیژنەی ئەمنیی ئەنجوومەنی پارێزگای نەینەواش دەڵێت، پێشمەرگە هێزێکی نیشتمانییە و گومان لە پاشەکشێی لەو سنوورە نییە.

 

چیرۆکی سەرەکی: عیدان شێخ کالۆ، ئەندامی کۆتای ئێزیدییەکان لە ئەنجوومەنی پارێزگای نەینەوا، لە پڕۆگرامێکی کەناڵی عەهدی نزیک لە عەسائیبی ئەهلی حەق داوای لە سوودانی، سەرۆکوەزیرانی عێراق کرد بارودۆخی سنووری 35 کیلۆمەتر کە لەلایەن پێشمەرگەوە کۆنترۆڵکراوە، چارەسەر بکات وەک ئامادەسازییەک لە پاراستنی ئەو سنوورە لەو گۆڕانکارییانەی لە سووریا ڕوویانداوە.

 

وێنە گەورەکە: فیشخابور بۆ مەحموودییە مەوداکەی 35 کیلۆمەترە و دەكەوێتە سێگۆشەی سنووری نێوان عێراق، توركیا و سووریا بەناوچەیەكی ستراتیژی هەژمار دەكرێت، لایەنەکانی نزیک لە پەکەکە دەیانەوێ ئاڵۆزییەکانی سووریا بقۆزنەوە، بۆ ئەوەی پاشەکشی بە هێزی پێشمەرگە لە سنوورەکە بکەن، کە لە 2003 ـەوە دەیپارێزێت.

 

لێدوانی فەرمی: محەممەد جاسم، سەرۆکی لیژنەی ئەمنیی ئەنجوومەنی پارێزگای نەینەوا بە ئاڤای گوت، "پێشمەرگە هێزێکی نیشتمانییە و 31 ساڵە ئەو سنوورە دەپارێزێت و گومان لە پاشەکشێی ناکرێت، هەروەها ئەو هێزەی دەکەوێتە دیوی ڕۆژئاوای کوردستان هێزی هێرشبەرنین و مەترسی ئەوتۆیان نییە."

 

ئەمەش بزانە: جگە لە هێزی پێشمەرگە، پاسەوانی سنووری عێراق 30 خاڵی لەو ناوچانە جێگیرکراون، سنوورەکە پێویستی بە کەرستەی زیاتری چاودێریی و پاراستن وەک کامێرای چاودێریی هەیە.