دابەشکردنی بەنزینی حکومی لە هەولێر دەكرێتە كۆبۆن

ئاڤا نیوز

پێدانی بەنزینی حکومی لە هەولێر دەکرێتە کۆبۆن و ئۆتۆمبێلە تایبەتەکان لە هەفتەیەکدا 40 لیتر بەنزینیان پێدەدرێت، تاکسی و بارهەڵگرەکانیش بڕێکی زیاتر.

وێنە گەورەکە: بەمەبەستی سوودمەندبوونی سەرجەم هاونیشتمانیان لە بەنزین و گازی حکومیی هەرزان، پارێزگای هەولێر کار لەسەر ئەوە دەکات لەپاڵ نەوت و غاز، دابەشکردنی بەنزینیش بکاتە کۆبۆن و هەفتانە سەرجەم شۆفێران بڕێکی دیاریکراو وەربگرن.

لێدوانی فەرمی: ئومێد خۆشناو پارێزگاری هەولێر بە ئاڤا نیوزی  ڕاگەیاند: "پلانمان هەیە ئەمساڵ سەرجەم سووتەمەنییەكانی غاز و نەوت و بەنزینی پاڵپشتیكراو بكەینە كۆبۆنی ئەلیكترۆنی، بۆ ئەوەی سەرجەم هاونیشتمانیان بتوانن بەشێوەیەكی دادپەروەرانە لێی سوودمەند ببن."

زانیاریی زیاتر: ئۆتۆمبێلە تایبەتەکان هەفتانە 40 لیتر بەنزینی نۆرماڵیان بە کۆبۆن و بە نرخی 750 دینار پێدەدرێت، بۆ تاکسی و ئۆتۆمبێلە بارهەڵگرەکانیش تاوەکو ئێستا بڕەکە دیارینەکراوە، لەمبارەیەوە ئومێد خۆشناو دەڵێت: "جارێ هەر پلانە بۆیە هەموو شتێک بەوردی دیارنییە".