وێنە و زانیاریی تایبەت؛ چیرۆکی کڕین و داخستنی ماڵی مام جەلال لە دیمەشق

ئاڤا نیوز

ئاڤا چیرۆکی کڕین و وردەکاریی داخستنی ماڵی مام جەلال لە دیمەشق لەلایەن چەکدارانی دەستەی تەحریرولشام ئاشکرا دەکات، دەستکاری هیچ کەلوپەلێکی نەکراوە و بڕیارە لە یەک دوو ڕۆژی داهاتوودا بکرێتەوە.

چیرۆکی سەرەکی: 3ـی ئەم مانگە هێزێکی ئەمنی سەر بە دەستەی تەحریرولشام لە دیمەشق، لە یەک کاتدا چوونە سەر سێ شوێن کە پەیوەندیدار بوون بە یەکێتیی نیشتمانیی کوردستانەوە و دایانخستن.

شوێنەکان ئەمانە بوون:

- ماڵی مام جەلال  دەکەوێتە گەڕەکی مەزرەعە لەناوەڕاستی دیمەشق.

- ماڵی عەبدولرەزاق کۆیی نوێنەری یەکێتی لە سووریا دەکەوێتە چەند کۆڵانێک لە دووری ماڵی مام جەلال لە گەڕەکی مەزرەعە.

- بارەگای نوێنەرایەتی یەکێتی دەکەوێتە شەقامی بەغدا لە دیمەشق.

زانیاریی تایبەت: چەکدارەکان لەو سێ شوێنە تەنیا چوونەتە ژووەرەوە و دەستیان لە هیچ نەداوە، کلیلەکانیان بردووە و ڕۆیشتوون.

ئەوەی زۆر قسەی لەبارەوە کرا ماڵی مام جەلال بوو لە گەڕەکی مەزرەعە. ئاڤا میدیا بەدواداچوونی کردووە بۆ مێژووی کڕینی ئەو شووقەیە، تا ئێستا دوو گێڕانەوەی لەبارەوە هەن.

گێڕانەوەی یەکەم: ساڵی 1974 بە دیاریکراوی ساڵێک بەرلەوەی یەکێتی خۆی ڕابگەیێنێت، مام جەلال لە دیمەشق دەمایەوە، ئەو کاتە هێرۆخان چەند پارچەیەک زێڕی خۆی دەفرۆشێت و ئەو شووقەیەی پێ دەکڕن. لەو کاتەوە دەبێتە شوێنی مانەوەی مام جەلال و لەوێ چاوی بە کەسایەتییەکان و خەڵک دەکەوێت.

گێڕانەوەی دووەم: بەهرۆز گەڵاڵی، نوێنەری پێشووی یەکێتییە لە تورکیا. دەڵێت: "مام جەلال هاوڕێیەکی هەبوو زۆری خۆشدەویست و ناوی عەبدولئیلا نەسراوی بوو. ئۆپۆزیسیۆنی دەسەڵاتی بەعس بوو لە عێراق و ئەویش لە دیمەشق دەمایەوە. جارێکیان پێویستی بە یارمەتی دەبێت و مام جەلالیش دوو هەزار دیناری دەبێت و هەمووی پێدەدات، دوای ساڵانێک عەبدولئیلا دەیەوێت پارەکە بۆ مام جەلال بگەڕێنێتەوە، بەڵام ئەو ڕازی نابێت وەریبگرێتەوە. دوای ماوەیەک بەو پارەیە شووقەیەک دەکڕێت و بە ناوی مام جەلالی دەکات و کلیلەکەی پێدەدات، دوای مشتومڕێکی زۆریش مام جەلال کلیلی شووقەکە وەردەگرێت.

لەلایەکی دیکەوە: ڕۆژنامەنووس سەرتیپ جەوهەر ساڵی 2019 چووەتە ئەو ماڵە و چەند وێنەیەکی ماڵەکەی گرتوون و دوو وێنەی بۆ ئاڤا ناردوون. ناوبراو بە ئاڤا نیوزی گوت: "شووقەکە دەکەوێتە گەڕەکی مەزرەعە کە یەکێکە لە گەڕەکە مۆدێرنەکانی دیمەشق و نزیکە لە مزگەوتی ئیمان. کاتێک سەردانی ماڵەکەم کرد یەکێک لەو کتێبانەی بەرچاوم کەوت و دواتر زانیم دوایین کتێب کە مام جەلال لەو خانووە خوێندوویەتییەوە، کتێبی (ما هی الاشتراکیە - کلیمینتیڤ ڤاسیلیڤیا) بووە.

ئەمەش بزانە: ئاڤا زانیویەتی دوای ئەوەی بڵاوکرایەوە چەکدارانی تەحریرولشام ماڵی مام جەلالیان داخستووە، باڵیۆزخانەی عێراق هاتووەتە سەر خەت و بڕیارە لەم یەک دوو ڕۆژدا کلیلەکان بگەڕێننەوە و دووبارە بکرێتەوە.

وێنەکان لەلایەن ڕۆژنامەنووس سەرتیپ جەوهەر بۆ ئاڤا نیوز نێردراون


دیمەنێک لە ژوورەوەی شووقەکەی مام جەلال


دیمەنێک لەو باڵەخانەیەی شووقەکەی مام جەلالی تێدایە