عەممار حەکیم سەردانی سلێمانی و هەڵەبجە دەکات

ئاڤا نیوز

سەرۆکی ڕەوتی حیکمەی نیشتمانی سەردانی شاری سلێمانی دەکات و دوای کۆبوونەوەی لەگەڵ بەرپرسانی باڵای یەکێتیی لە دەباشان، ڕۆژی دواتر سەردانی پارێزگای هەڵەبجە دەکات.

 

زانیاریی بەدەستهاتوو: بەگوێرەی میدیاکانی یەکێتی، بڕیارە ئەمڕۆ سێشەممە 7-1-2025، عەممار حەکیم، سەرۆکی ڕەوتی حیکمەی نیشتمانی سەردانی شاری سلێمانی بکات و لەگەڵ بافڵ، تاڵەبانی سەرۆکی یەکێتیی نیشتمانیی کوردستان لە دەباشان کۆببێتەوە.

 

لێدوانی فەرمی: نووسینگەی عەممار حەکیم بە ئاڤا میدیای ڕاگەیاند، سەردانەکەی حەکیم بۆ هەڵەبجە لەبەر پێگە و گەورەیی ئەو شارەیە و بڕیارە لەگەڵ هۆز و کەسایەتییە دیارەکانی ئەو دەڤەرە کۆ ببێتەوە. 

 

لەلایەکی دیکەوە: ئازاد تۆفیق، پارێزگاری هەڵەبجە لە لێدوانێکدا بە ئاڤا میدیای ڕاگەیاند: لە میانی سەردانەکەی بۆ سلێمانی، عەممار حەکیم، سەرۆکی ڕەوتی حیکمەی نیشتمانی سەردانی پارێزگای هەڵەبجەش دەکات.

 

قووڵتر: بە گوتەی پارێزگاری هەڵەبجە، سەردانەکەی سەرۆکی ڕەوتی حیکمەی نیشتمانی سەردانی سبەی چوارشەممە دەبێت، بەبێ ئەوەی ئەجێندای سەردانەکەی بۆ پارێزگاکە ئاشکرا بکات.

 

ئەوەی پێویستە بیزانیت: لە ماوەی ساڵی ڕابردوودا، سەرۆکی ڕەوتی حیکمەی نیشتمانی سەردانی شارەکانی هەرێمی کوردستانی کردو لە میانی سەردانەکەیدا لەگەڵ ژمارەیەک لە سەرۆک هۆز و شێخانی تەریقەتەکان لە ناوچە جیاجیاکان کۆبووەوە.