وەزیری دەرەوەی ئیتاڵیا سەردانی دیمەشق دەکات

ئاڤا نیوز

 

ئەنتۆنیۆ تاجانی، وەزیری دەرەوەی ئیتاڵیا لە کاتی گەیشتنی بە سووریا سەردانی مزگەوتی ئومەوی دیمەشقی کرد و دواتر لەگەڵ ئەحمەد شەرع و ئەسعەد شەیبانی کۆبووەوە.

 

چیرۆکی سەرەکی: ئەمڕۆ هەینی ئەنتۆنیۆ تاجانی، وەزیری دەرەوەی ئیتاڵیا لە کاتی گەیشتنی بە سووریا سەردانی مزگەوتی ئومەوی دیمەشقی کرد و لەگەڵ هاوتاکەی ئەسعەد شەیبانی کۆنگرەیەکی ڕۆژنامەوانی ئەنجامدا، دواتر لەگەڵ ئەحمەد شەرع، بەرپرسی ئیدارەیی نوێی سووریا کۆبووەوە و باسی لە کەمکردنەوەی ئەو گەمارۆیانە کرد کە بەسەر ئەو وڵاتەدا سەپێنراون لە کاتی حکومڕانی بەشار ئەسەدا.

 

لێدوانی فەرمی: ئەسعەد شەیبانی لە کۆنگرەیەکی ڕۆژنامەوانیدا باسی لەوەکرد، بەم نزیکانە سەردانی وڵاتانی ئەوروپا دەکەم بە ئامانجی پتەوکردنەوەی پەیوەندییە دۆستانەکان.

 

زانیاریی زیاتر: هاتنی وەزیری دەرەوەی ئیتاڵیا بۆ سووریا دوای سەردانەکانی دەسەڵاتدارانی ئەمریکا، بەریتانیا، فەرەنسا، ئەڵمانیا و یەکێتی ئەوروپا دێت،  تاجانی دوای سەردانەکەی و کۆبوونەوەی لەگەڵ بەرپرسانی سووریا، بەیاننامەیەکی لەسەر تۆڕی کۆمەڵایەتی ئێکس بڵاوکردەوە و تیایدا ئاماژەی بەوەکرد، نوێنەران دەبێت سیاسەتەکانیان هەماهەنگ بکەن بۆ ئەوەی سووریا "داهاتوویەکی ئاشتی و سەقامگیری و خۆشگوزەرانی" هەبێت.