پارێزەرانی کەرکووک داوای ئاسانکاریی لە پێدانی مۆڵەتی چەک هەڵگرتن دەکەن

ئاڤا نیوز

 

لقی کەرکووکی سەندیکای پارێزەرانی عێراق داوا لە وەزیری ناوخۆی عێراق دەکات، مۆڵەتی یاساییان پێبدەن بۆ هەڵگرتنی چەک، کە وەک خۆیان دەڵێن بۆ "بەرگریکردنە لەو هێرش و هەڕەشانەی ڕووبەروویان دەبێتەوە".

 

وێنە گەورەکە: دیاردەی کوشتن، دەستدرێژیکردن و هەڕەشەکردن لە پارێزەران لە پارێزگاکانی ناوەڕاست و باشووری عێراق بەربڵاوە، زۆرجار پارێزەران لەبەرامبەر بەرگریکردن لە کەیسی هاووڵاتیان دەبنە قوربانی و دەکوژرێن.

 

ڕاگەیێنراوی فەرمی: سەندیکای پارێزەرانی کەرکوک لە بەیاننامەیەکدا داوای لە عەبدولئەمیر شەممەری، وەزیری ناوخۆی عێراق کرد، ڕێکارەکانی پێدانی مۆڵەتی چەک هەڵگرتن بۆ پارێزەران ئاسان بکات. ئاماژەشی بەوە کرد کە کاری پارێزەرایەتی بە مەترسی دەورە دراوە و ئەوانیش پێویستیان بە پاراستنی خۆیان هەیە لەو مەترسیانە.

 

ئەوەی پێویستە بیزانیت: لە ڕۆژانی ڕابردوو دوو پارێزەر لە دوو ڕووداوی جیا لە پارێزگای کەرکووک ڕووبەڕووی دەستدرێژی و هەڕەشە بوونەوە، ئەمەش ناڕەزایەتیی پارێزەران و سەندیکای پارێزەرانی بەدوای خۆیدا هێنا.